गौराई आगमन: पारंपरिक पद्धतीने महिलांचा जल्लोष, घरोघरी चैतन्य
गणपती बाप्पांच्या आगमनानंतर आता पुणे शहरात आणि उपनगरांत गौराईचे स्वागत जल्लोषात आणि पारंपरिक पद्धतीने करण्यात आले आहे. घरोघरी आनंदाचे वातावरण असून, महिलांनी नऊवारी, पैठणी, दागिने आणि फुलांच्या अलंकारांनी सजून गौराईचे थाटामाटात स्वागत केले. घरासमोर काढलेल्या आकर्षक रांगोळ्या, दारावर लावलेली तोरणे, फुलांनी सजवलेली मंदिरे आणि सुंदर घरांची सजावट यामुळे सर्वत्र चैतन्य पसरले आहे.
गौराईचे पूजन आणि पारंपरिक नैवेद्य
गौराईच्या आगमनावेळी महिलांनी मनोभावे पूजा-अर्चा केली. आरती, फुलोरा, नैवेद्य दाखवून गौराईंचे स्वागत करण्यात आले. लाडू, करंजी, चिवडा, शंकरपाळी आणि पुरणपोळी अशा पारंपरिक पदार्थांचा नैवेद्य अर्पण करण्यात आला. ‘माहेरवाशीण’ म्हणून आलेल्या गौराईंना घरात लक्ष्मीचे रूप मानले जाते, त्यामुळे संपूर्ण कुटुंबाने त्यांचे मोठ्या आदराने स्वागत केले. प्रवेशद्वारावर रांगोळीत उमटवलेल्या लक्ष्मीच्या पावलांच्या ठशांनी हे आगमन अधिक मंगलमय झाले आहे.
सजावट आणि उत्सवी सोहळा
गौराईंच्या मूर्तींना आणि पाटावर बसवलेल्या प्रतीकांना फुलांनी आणि वेलींनी सजवले होते. रेशमी साड्या, सोन्याचे दागिने, चंदन-हळदीचा श्रृंगार यामुळे गौराईचे रूप अधिकच उजळून दिसत होते. काही ठिकाणी महिलांनी एकत्र येऊन “आली गवर आली सोनपावली आली” अशी गाणी गात गौराईच्या स्वागताचा आनंद द्विगुणित केला.
गौरीपूजन आणि विसर्जनाची परंपरा
भाद्रपद शुद्ध पक्षात गौरींचे पूजन करण्याची परंपरा आहे. यंदा अनुराधा नक्षत्रावर गौराईंचे आवाहन झाले असून, सोमवारी (१ सप्टेंबर) ज्येष्ठा नक्षत्रावर गौरीपूजन होणार आहे. कुटुंबाच्या सुख-समृद्धी, आरोग्य आणि ऐश्वर्यासाठी महिलांनी गौराईंना अन्न, वस्त्र आणि अलंकार अर्पण करणे ही जुनी परंपरा आहे.
गौरींचे विसर्जन मंगळवारी (२ सप्टेंबर) मूळ नक्षत्रावर रात्री ९.५७ वाजेपर्यंत होणार असून, महिलांनी गौराईंना निरोप देण्याची तयारी सुरू केली आहे. पुढील वर्षी पुन्हा येण्याचे आवाहन गौराईंना केले जात आहे.
न्यूज अनकट प्रतिनिधी सोनाली तांबे
