कोलकाता, १२ मार्च २०२३ : लोकसभा निवडणुकीपूर्वी भाजपविरोधी पक्ष एकत्र येण्याचा प्रयत्न करीत आहेत. दरम्यान, केंद्रातील भाजप सरकारकडून केंद्रीय तपास यंत्रणांचा गैरवापर होत असल्याचा आरोप विरोधकांनी केला आहे. आम आदमी पक्षाच्या पुढाकाराने दिल्लीत ही बैठक आयोजित करण्यात आली आहे. यात भाजपविरोधी मुख्यमंत्री सहभागी होणार आहेत. पश्चिम बंगालच्या मुख्यमंत्री ममता बॅनर्जीही या बैठकीला उपस्थित राहू शकतात. याआधी विरोधी पक्षांनी पीएम मोदींना पत्र लिहून ‘ईडी’ आणि ‘सीबीआय’च्या गैरवापरावर चिंता व्यक्त केली होती.
केंद्रीय तपास यंत्रणा ‘ईडी’ आणि ‘सीबीआय’चा गैरवापर होत असल्याची तक्रार विरोधी पक्षनेते बऱ्याच दिवसांपासून करीत आहेत. यावेळी त्यांची बैठक होणार आहे. केंद्रीय तपास यंत्रणांच्या गैरवापरावर भाजपेतर मुख्यमंत्री लवकरच दिल्लीत बैठक घेणार आहेत.
मिळालेल्या माहितीनुसार, आम आदमी पक्षाच्या नेतृत्वाखाली ही बैठक आयोजित करण्यात आली आहे. राज्याच्या मुख्यमंत्री ममता बॅनर्जी या बैठकीला उपस्थित राहू शकतात. या बैठकीला उपस्थित राहण्यासाठी त्या तीन दिवसांच्या दिल्ली दौऱ्यावर जाऊ शकतात. सूत्रांनी दिलेल्या माहितीनुसार या महिन्याच्या अखेरीस अर्थसंकल्पीय अधिवेशनाचा दुसरा टप्पा सुरू होणार आहे. त्यानंतरच ही बैठक घ्यावी लागणार आहे. आम आदमी पक्ष, तृणमूल काँग्रेस, आरजेडी, राष्ट्रवादीसह नऊ पक्ष या बैठकीत सहभागी होण्याची शक्यता आहे.
अलीकडेच नऊ विरोधी नेत्यांनी पंतप्रधान नरेंद्र मोदी यांना पत्र लिहून केंद्रीय तपास यंत्रणेचा गैरवापर केल्याचा आरोप केला होता. पत्रावर पश्चिम बंगालच्या मुख्यमंत्री ममता बॅनर्जी, दिल्लीचे मुख्यमंत्री अरविंद केजरीवाल, तेलंगणाचे मुख्यमंत्री के. चंद्रशेखर राव, राजद नेते आणि बिहारचे उपमुख्यमंत्री तेजस्वी यादव, ‘राष्ट्रवादी’चे अध्यक्ष शरद पवार, समाजवादी पक्षाचे प्रमुख अखिलेश यादव, यूबीटी नेते उद्धव ठाकरे जेकेएनसी नेते फारुख अब्दुल्ला आणि पंजाबचे मुख्यमंत्री भगवंत मान यांनी त्यावर स्वाक्षरी केली.
मनीष सिसोदिया यांच्या अटकेचा निषेध करण्याबरोबरच, शुभेंदू अधिकारी आणि हिमंता बिस्वा शर्मा यांसारख्या नेत्यांनी भाजपमध्ये प्रवेश केल्यानंतर केंद्रीय तपास यंत्रणेने त्यांच्याविरुद्धचा तपास बंद केला असल्याचा आरोपही करण्यात आला. अलीकडेच ‘ईडी’ने बिहारमध्ये लालू यादव आणि तेजस्वी यादव यांच्यावर छापे टाकले. मनीष सिसोदिया यांना दिल्लीत अटक करण्यात आली आहे. कोलकात्यातही बंगालमधील अनेक टीएमसी नेत्यांना अलीकडेच ‘सीबीआय’ आणि ‘ईडी’ने अटक केली आहे. यावर आता सर्व विरोधी पक्षांनी एकत्र येण्याची कसरत सुरू केली आहे.
‘न्यूज अनकट’ प्रतिनिधी : सूरज गायकवाड
