शालेय प्रवास महागणार! एप्रिलपासून स्कूल बसच्या भाड्यात वाढ?

पुणे, २४ फेब्रुवारी २०२५ – पालकांसाठी एक मोठी आणि त्रासदायक बातमी आहे. आधीच वाढत्या महागाईमुळे त्रस्त असलेल्या पालकांच्या खिशाला आता आणखी एक भुर्दंड पडणार आहे. पुणे बस अँड कार ओनर्स असोसिएशनने १ एप्रिलपासून स्कूल बसच्या भाड्यात ५ ते १० टक्के वाढ करण्याचे संकेत दिले आहेत. त्यामुळे मुलांच्या शिक्षणाचा खर्च वाढणार असून, पालकांचे आर्थिक गणित कोलमडण्याची शक्यता आहे.

वाढत्या खर्चामुळे भाडेवाढ अपरिहार्य!

बस मालक संघटनेच्या म्हणण्यानुसार, स्कूल बसच्या देखभालीचा खर्च खूप वाढला आहे. स्पेअर पार्ट्स, टायर, बॅटरी, ऑइल, सीसीटीव्ही, जीपीएस आणि इतर सुविधांसाठी मोठा खर्च येतो. तसेच, चालक आणि लेडी अटेंडंटचे वाढते वेतन, नवीन नियमांमुळे बसच्या किमतीत झालेली वाढ आणि इंधनाचा खर्च यामुळे सध्याचे भाडे परवडत नसल्याचे संघटनेचे अध्यक्ष राजन जुनवणे यांनी सांगितले.

पालकांच्या खिशाला फटका!

पालक वर्षाला साधारण २० ते ३५ हजार रुपये स्कूल बससाठी खर्च करतात. यावर्षी भाडेवाढ झाली, तर हा आकडा आणखी वाढण्याची शक्यता आहे. विशेष म्हणजे, शाळेचे सत्र १० महिन्यांचे असतानाही, काही शाळांमध्ये ११ किंवा १२ महिन्यांचे शुल्क आकारले जात असल्याने पालकांमध्ये नाराजी आहे.

पालकांकडे दुसरा पर्याय नाही?

महागड्या इंग्रजी शाळांचे शुल्क आधीच पालकांच्या बजेटला ताण देत आहे. त्यातच घरातील दोघेही नोकरी करत असल्याने अनेक पालकांना स्कूल बस हा एकच पर्याय दिसतो. त्यामुळे ही दरवाढ परवडणार कशी, हा मोठा प्रश्न आहे.

महागाईचे चक्र आणि वाढता भार

नवीन BS-6 उत्सर्जन नियमांमुळे गाड्यांची किंमत २.५ ते ३ लाखांनी वाढली आहे. तसेच, लिक्विड युरियाची (AdBlue) टाकी बसमध्ये बसवावी लागते, जी डिझेलच्या ५ ते ८ टक्के अतिरिक्त खर्चास कारणीभूत ठरते. या सर्व कारणांमुळे, बस मालकांसाठी जुन्या दरात सेवा देणे कठीण होत आहे.

पालकांचा सवाल – “ही लूट थांबणार कधी?”
शालेय वाहतूक ही मुलांच्या सुरक्षिततेसाठी आवश्यक असली, तरी वाढत्या शुल्कामुळे पालक त्रस्त झाले आहेत. “दरवर्षी नवीन कारणे देऊन भाडे वाढवले जाते, पण त्यावर नियंत्रण कोण ठेवणार?” असा सवाल पालक विचारत आहेत.

एप्रिलपासून नवीन दर लागू?

पुणे बस अँड कार ओनर्स असोसिएशनने १ एप्रिलपासून ५ ते १० टक्के भाडेवाढ करण्याचे संकेत दिले आहेत. त्यामुळे पुढील काही आठवड्यांत यावर अंतिम निर्णय होईल. तोपर्यंत पालकांनी या वाढीचा ताण कसा सहन करायचा, याचा विचार करणे गरजेचे आहे!

न्यूज अनकट प्रतिनिधी – सोनाली तांबे