पिंपरी-चिंचवडकरांनो, आता पुणे शहर आणि परिसरातील पर्यटनस्थळांची सैर करणे झाले अगदी सोपे आणि आरामदायक! पुणे महानगर परिवहन महामंडळाने (PMP) पर्यटकांसाठी खास ‘पुणे दर्शन’ बससेवा सुरू केली आहे, ज्यामुळे पिंपरी-चिंचवड शहरातील नागरिकांनाही या सेवेचा लाभ घेता येणार आहे. विशेष म्हणजे, हा संपूर्ण प्रवास इलेक्ट्रिक वातानुकूलित (AC) बसमधून गारेगार आणि आरामदायी असणार आहे.
केवळ ५०० रुपयांच्या माफक दरात पर्यटकांना शहरातील प्रेक्षणीय आणि धार्मिक स्थळांना भेट देण्याची संधी मिळणार आहे. ही बससेवा आठवड्यातील प्रत्येक शनिवार, रविवार आणि सार्वजनिक सुट्टीच्या दिवशी उपलब्ध असणार आहे.
पिंपरी-चिंचवडकरांसाठी मोठी पर्वणी!
पीएमपीच्या पुणे दर्शन बस १३ मार्गांवर धावणार असून, त्यापैकी तीन मार्ग थेट पिंपरी-चिंचवड शहरातून जातात. त्यामुळे चिंचवडमधील मोरया गोसावी मंदिर, प्रतिशिर्डी, देहूगाव आणि गाथा मंदिर यांसारख्या महत्त्वाच्या धार्मिक स्थळांना भेट देणे आता सहज शक्य होणार आहे.
पिंपरी-चिंचवडसाठीचा विशेष मार्ग (मार्ग क्र. ८) आहे: भक्ती-शक्ती निगडी – अप्पूघर – इस्कॉन मंदिर – मोरया गोसावी मंदिर (चिंचवड) – प्रतिशिर्डी – देहूगाव – गाथा मंदिर – आळंदी – भक्ती-शक्ती निगडी.
‘पुणे दर्शन’ बसची खास वैशिष्ट्ये
- आरामदायी प्रवास: पूर्णपणे इलेक्ट्रिक आणि वातानुकूलित बसेस.
- माफक दर: प्रति व्यक्ती केवळ ५०० रुपये.
- मार्गदर्शन: तिकीट दरात प्रत्येक पर्यटनस्थळावर मार्गदर्शन आणि थांब्यांची व्यवस्था समाविष्ट.
या सेवेमुळे पिंपरी-चिंचवडमधील पर्यटकांची गैरसोय दूर होणार असून, अत्यंत माफक दरात ऐतिहासिक आणि धार्मिक स्थळांचे दर्शन घेणे शक्य होणार आहे. किशोर चौहान, कामगार व जनता संपर्क अधिकारी यांनी या सेवेचा अधिकाधिक पर्यटकांनी लाभ घेण्याचे आवाहन केले आहे, ज्यामुळे हरित पर्यटनाला चालना मिळेल.
तिकीट काढण्यासाठी, बस सुटणाऱ्या पहिल्या बसथांब्यावर सुविधा उपलब्ध आहे, तसेच ‘आपली पीएमपीएमएल’ ॲपद्वारेही ऑनलाइन तिकीट बुक करता येईल.
न्यूज अनकट प्रतिनिधी: सोनाली तांबे
