कामशेत-कार्ला एकत्र, महिला आरक्षणामुळे इच्छुकांचे गणित बिघडले, चुरशीची लढत!
वडगाव नगरपंचायतीच्या स्थापनेनंतर जिल्हा परिषद गटांची पुनर्रचना झाल्यामुळे खडकाळा-कार्ला गटाचे राजकीय समीकरण पूर्णपणे बदलले आहे. पूर्वीचा खडकाळा गट आता कामशेत ते कार्ला परिसराला जोडला गेला आहे. या नव्या भौगोलिक रचनेत एका बाजूला कामशेतसारखे शहर तर दुसऱ्या बाजूला ग्रामीण भाग अशी मिश्र रचना आहे.
सर्वात मोठा बदल म्हणजे हा गट आता सर्वसाधारण महिलेसाठी आरक्षित झाला आहे, ज्यामुळे मागील निवडणुकीतील अनेक इच्छुक उमेदवारांचे मनसुबे उधळले आहेत. यापूर्वी हा गट सर्वसाधारण वर्गासाठी होता. कार्ला गण सर्वसाधारण (महिला) तर कामशेत गण अनुसूचित जाती प्रवर्गासाठी आरक्षित झाला आहे. त्यामुळे अनेकांनी माघार घेतली असली तरी, काही इच्छुक आपल्या सौभाग्यवतींना उमेदवारी देण्यासाठी प्रयत्नशील आहेत आणि सोशल मीडियावर आपली अप्रत्यक्ष उपस्थिती दर्शवत आहेत.
नव्या रचनेनुसार, ग्रामीण शेतकरीवर्गाचे वर्चस्व अधिक दिसून येते. गट क्रमांकानुसार एकूण मतदारसंख्या ५७,७७७ इतकी आहे (खडकाळा: ३९,१०३ आणि कार्ला: १८,६७४). या गटात भाजप आणि राष्ट्रवादी काँग्रेसच्या (अजित पवार गट) मध्ये चुरशीची लढत अपेक्षित आहे. तसेच, शिवसेनेची भूमिकाही निर्णायक ठरणार आहे.
मागील निवडणुकीत अपक्ष उमेदवार बाबूराव वायकर यांनी विजय मिळवला होता, पण यावेळी आरक्षणातील बदलांमुळे संपूर्ण चित्र पालटले आहे. कामशेत गण अनुसूचित जाती प्रवर्गासाठी आरक्षित झाल्याने अनेक जुन्या इच्छुकांनी माघार घेतली आहे. पक्षांकडून अद्याप अधिकृत उमेदवारी जाहीर न झाल्यामुळे सध्या गटातील वातावरण शांत असले तरी, महिला उमेदवारांच्या रूपाने ही लढत अत्यंत रोचक ठरणार यात शंका नाही!
 आणि शिवसेना यांच्यात रोचक सामना होणार आहे.){kind=link}