उद्या दुपारी एक वाजता दहावीचा निकाल होणार जाहीर, बोर्डाच्या संकेतस्थळावर विद्यार्थ्यांना पाहता येणार निकाल

मुंबई, १ जून २०२३ : दहावीच्या निकालाची धाकधूक आणि उत्सुकता असणाऱ्या सर्व विद्यार्थी आणि पालकांसाठी उद्याचा दिवस महत्वापूर्ण असणार आहे. महाराष्ट्र राज्य माध्यमिक आणि उच्च माध्यमिक मंडळाच्या दहवीच्या परीक्षेचा निकाल उद्या, (२ जून) रोजी जाहीर करण्यात येणार आहे. उद्या दुपारी एक वाजता हा निकाल बोर्डाच्या संकेतस्थळावर ऑनलाईन पाहता येणार आहे.

बोर्डाने निकाल जाहीर केल्यानंतर, विद्यार्थी आपला निकाल बोर्डाच्या संकेतस्थळावर पाहू शकणार आहेत.विद्यार्थी निकालाची वाट उत्सुकतेने पाहत आहेत. निकालाची पत्रकार परिषद सकाळी अकरा वाजता आयोजित करण्यात आली आहे. उद्या दुपारी १ वाजता निकाल जाहीर होणार आहे.

महाराष्ट्र राज्य माध्यमिक व उच्च माध्यमिक शिक्षण मंडळामार्फत मार्च २०२३ मध्ये घेण्यात आलेली दहावीची लेखी परीक्षा २ ते २५ मार्च या कालावधीत झाली. यंदा २३ हजार १० शाळांमधून १५ लाख ७७ हजार २५६ विद्यार्थ्यांनी परीक्षेसाठी नोंदणी केली. परंतु मागील पाच वर्षाच्या तुलनेत यंदा परीक्षेसाठी नोंदणी करणाऱ्या विद्यार्थ्यांची संख्या कमी असल्याचे निदर्शनास आले आहे. गेल्या वर्षाच्या तुलनेत यंदा विद्यार्थ्यांची नोंदणी तब्बल ६१ हजार ७०८ ने कमी झाली आहे.

न्यूज अनकट प्रतिनिधी – अनिल खळदकर