अहमदाबाद सी प्लेन सेवा पुन्हा बंद…मेंटेनेंस साठी मालदीवला रवाना

अहमदाबाद, २९ नोव्हेंबर २०२०: देशातील पहिली सी-प्लेन सेवा म्हणजेच अहमदाबाद ते केवडिया स्टॅच्यू ऑफ युनिटी ही सेवा शनिवारपासून १५ दिवसांसाठी बंद ठेवण्यात आली आहे. यापूर्वीही सी-प्लेन सेवा ३-३ दिवसांकरिता बंद केली गेली होती.

नागरी उड्डयन विभागाचे संचालक कॅप्टन अजय चौहान यांचे म्हणणे आहे की सी-प्लेनचे उड्डाण तास संपल्यामुळे त्यांना सर्व्हिसिंगची आवश्यकता आहे, त्यासाठी अहमदाबादहून मालदीव येथे सी-प्लेन परत पाठविण्यात आले आहे. आता सी-प्लेनचा हा क्रू दुसर्‍या सी-प्लेनसह अहमदाबादला परत येईल आणि त्यानंतर ते विमान येथे अहमदाबादमध्येच राहणार आहे. दरम्यान, यास सुमारे १० ते १५ दिवस लागतील. सी-प्लेनची सेवा सी-प्लेनच्या आगमनानंतरच पुन्हा सुरू होईल.

पंतप्रधान नरेंद्र मोदी यांनी सी-प्लेन सेवा सुरू करून अजून एक महिनाही झाला नाही. पंतप्रधान नरेंद्र मोदी यांनी स्वत: उपस्थित राहून केवडियाहून अहमदाबादला समुद्री-विमान सेवा सुरू केली. विशेष म्हणजे यापूर्वी सी-प्लेन सेवा –३ दिवस बंद ठेवण्यात आली होती. त्यावेळीही असे म्हटले होते की मेंटेनेंस साठी ही सेवा थांबवण्यात आली आहे.

देशातील पहिली सी-प्लेन सेवा अहमदाबादमध्ये सुरू झाली जी स्पाइस जेटद्वारे सुरू करण्यात आली होती, परंतु सी-प्लेनचे हे विमान ५० वर्षां पूर्वीचे आहे. हे चालविणारी कंपनी स्पाइस जेटचे सीएमडी अजय सिंह यांनी सांगितले की हे विमान कदाचित जुने असेल परंतु त्याची स्थिती खूप चांगली आहे आणि ते पूर्णपणे सुरक्षित आहे. त्याची नियमित सेवा केली गेली आहे.

न्यूज अनकट प्रतिनिधी: ईश्वर वाघमारे