ट्रक चालकाचा अडवून लुटणाऱ्यांना सहा तासात अटक

बारामती ११ फेब्रुवारी २०२१: ट्रक चालकाला थांबवून चाकूचा धाक दाखवत त्याच्याकडील २० हजार रुपयांची रक्कम जबरीने चोरून नेल्याच्या गुन्ह्याचा शहर पोलिसांनी अवघ्या सहा तासात छडा लावला.याप्रकरणी चौघांना अटक करण्यात आली आहे. चोरीला गेलेल्या २० हजारांच्या रकमेसह गुन्ह्यात वापरलेली स्विफ्ट कार पोलिसांनी हस्तगत केली आहे.

सदा शंकर बोडरे (वय २१), रोहित महादेव बोडरे (वय १९ ), आकाश राजू बोडरे (वय २०) व पप्पू संजय बोडरे (वय २८, सर्व रा. सोनगाव, ता. बारामती) अशी अटक करण्यात आलेल्या आरोपींची नावे आहेत. पोलिस निरीक्षक नामदेव शिंदे यांनी ही माहिती दिली.

प्रदीप सुखदेव घुमरे (रा. नगर रोड, बीड) या ट्रक चालकाने याबाबत शहर पोलिस ठाण्यात फिर्याद दिली होती. दि.९ रोजी रात्री साडे दहा वाजता शहरातील तुळजाभवानी मंदिराजवळ ही घटना घडली होती. आरोपींनी फिर्यादीच्या ताब्यातील ट्रक थांबवत चालक घुमरे यांना चाकूचा धाक दाखवत बळजबरीने खिशात हात घालून २० हजार रुपयांची रोख रक्कम व २० हजारांचा मोबाईल चोरून नेला होता. शहर पोलिस ठाण्याचे सहाय्यक पोलिस निरीक्षक प्रकाश वाघमारे व पथकाने तातडीने हालचाल करत या गुन्ह्यात चौघांना अटक केली.

न्युज अनकट प्रतिनिधी – अमोल यादव