इंडोनेशिया, 27 ऑक्टोंबर 2021: इंडोनेशियाचे माजी राष्ट्राध्यक्ष सुकर्णो यांची मुलगी सुकमावती सुकर्णोपुत्री हिने इस्लाम धर्म सोडून हिंदू धर्म स्वीकारला आहे. वृत्तानुसार, बालीच्या सुकर्णो सेंटर हेरिटेज एरियामध्ये सुकमावतीच्या धर्मांतरासाठी पारंपारिक कार्यक्रम आयोजित करण्यात आला होता. सुधी वदानी प्रक्रियेअंतर्गत त्यांनी हिंदू धर्म स्वीकारला. सीएनएन इंडोनेशियाच्या वृत्तानुसार, सुकमावती यांचे हिंदू धर्म स्वीकारण्यात त्यांची दिवंगत आजी इडा अयु न्योमन राय श्रींबेन यांचे मोठे योगदान आहे.
सुकमावती या इंडोनेशियन नॅशनल पार्टीच्या संस्थापक आहेत. सुकमावती यांनी कांजेंग गुस्ती पंगेरन आदिपती आर्य मांगकुनेगारा नववीशी लग्न केले आणि 1984 मध्ये त्यांचा घटस्फोट झाला. सुकमावती, 69, सुकर्णो यांची तिसरी मुलगी आणि माजी राष्ट्रपती मेगावती सुकर्णोपुत्री यांची धाकटी बहीण आहे. सुकमावती यांच्या वकिलाचे म्हणणे आहे की, सुकमावती यांना हिंदू धर्माची व्यापक समज आहे. त्यांना हिंदू धर्मशास्त्रातील सर्व तत्त्वे आणि विधींचीही समज आहे.
सुकमावतींना मुस्लिमांची माफी मागावी लागली
2018 मध्ये सुकमावती यांना वादाला सामोरे जावे लागले होते. त्यांनी अशी कविता म्हटल्याचा आरोप होता, त्यामुळे इस्लामचा अपमान झाला आहे. यानंतर इंडोनेशियातील कट्टरपंथी मुस्लिम गट या प्रकरणी सक्रिय झाले आणि त्यांनी सुकमावती यांच्यावर ईशनिंदेचा गुन्हा दाखल केला. सिडनी मॉर्निंग हेराल्डच्या वृत्तानुसार, या प्रकरणामुळे सुकमावती यांनी माफीही मागितली होती. या कवितेबद्दल मी इंडोनेशियातील तमाम मुस्लिमांची माफी मागते, असे त्या म्हणाल्या होत्या. विशेषत: ज्यांना ही कविता वाचून भावना दुखावल्या आहेत.
विशेष म्हणजे इस्लाम हा इंडोनेशियातील सर्वात मोठा धर्म आहे. अहवालानुसार, दक्षिण-पूर्व आशियाई देशात कदाचित जगातील सर्वात जास्त मुस्लिम लोकसंख्या आहे. त्याच वेळी, हिंदू धर्म हा इंडोनेशियाच्या सहा अधिकृत धर्मांपैकी एक आहे आणि इंडोनेशियामध्ये भारत, नेपाळ आणि बांग्लादेश नंतर जगातील चौथ्या क्रमांकाची हिंदू लोकसंख्या आहे. इंडोनेशियातील बाली बेटावर मोठ्या संख्येने हिंदू राहतात. येथे अनेक मंदिरेही पाहायला मिळतात आणि या मंदिरांमध्ये दूरदूरवरून भाविक प्रार्थना करण्यासाठी येतात.
न्यूज अनकट प्रतिनिधी: ईश्वर वाघमारे