पुणे, 28 ऑक्टोंबर 2021: सार्वजनिक क्षेत्रातील युनियन बँक ऑफ इंडियाने या दिवाळीत गृहकर्जामध्ये जबरदस्त ऑफर देऊन इतर बँकांना टक्कर दिली आहे. युनियन बँक ऑफ इंडियाने त्यांच्या गृहकर्जावरील व्याजदर 6.40 टक्क्यांवर आणले आहेत. कोणत्याही बँकेत गृहकर्जाचा इतका स्वस्त दर नाही.
बुधवार, 27 ऑक्टोबरपासून नवीन दर लागू होतील. युनियन बँकेत गृहकर्जाचा दर पूर्वी 6.80 टक्के होता. बँकेचे नवे दर 27 ऑक्टोबरपासून लागू होतील. बँकेने एका निवेदनात म्हटले आहे की, “या ऑफरचा आमच्या ग्राहकांना सणासुदीच्या काळात फायदा होईल कारण आम्हाला घर खरेदीची वाढती मागणी दिसत आहे.” या घटलेल्या व्याजदरामुळे, युनियन बँक ऑफ इंडियाचा गृहकर्ज दर हा उद्योगातील सर्वात स्पर्धात्मक आहे.
सर्व प्रकारच्या ग्राहकांना फायदा होईल
युनियन बँक ऑफ इंडियाने एका निवेदनात म्हटले आहे की त्यांच्या गृहकर्जावरील व्याज दर आता 6.40 टक्क्यांपासून सुरू होईल. बँकेसाठी हा आतापर्यंतचा सर्वात कमी गृहकर्ज दर आहे. बँकेने सांगितले की, नवीन कर्जासाठी अर्ज करणाऱ्या ग्राहकांव्यतिरिक्त, सध्याचे कर्ज हस्तांतरित करणाऱ्या ग्राहकांनाही याचा लाभ मिळेल.
आतापर्यंतचे सर्वात स्वस्त व्याजदर
युनियन बँकेने स्वस्तात गृहकर्ज करून उर्वरित बँकांना तगडे आव्हान दिले आहे. याआधी स्वस्त गृहकर्जाबद्दल सांगायचे तर, बँक ऑफ बडोदा, कोटक महिंद्रा आणि बँक ऑफ इंडियाने सणासुदीच्या ऑफर अंतर्गत 6.5 टक्के व्याजदराने गृहकर्ज दिले आहे. स्टेट बँक ऑफ इंडिया (SBI), ICICI बँक, पंजाब नॅशनल बँक, कोटक महिंद्रा बँक, HSBC, बँक ऑफ बडोदा इत्यादी देखील गृहकर्जाच्या व्याजदरात चांगली सूट देत आहेत.
पंजाब नॅशनल बँकेने गृहकर्जाचा दर 6.60 टक्क्यांवर आणला आहे. प्रथमच, SBI ने क्रेडिट स्कोर लिंक्ड होम लोन जाहीर केले आहे जे 6.70 टक्के दराने दिले जात आहे. कर्जाची रक्कम विचारात न घेता, व्याज दर 6.70 टक्के निश्चित केला जातो.
न्यूज अनकट प्रतिनिधी: ईश्वर वाघमारे