पुण्यात २१, २२ जानेवारीला तिसरे शब्दवेल साहित्य संमेलन; अध्यक्षपदी आसावरी काकडे, तर भारत सासणे उद्घाटक

पुणे, १६ जानेवारी २०२३ : नवोदितांना हक्काचे व्यासपीठ मिळवून देण्यासाठी सतत नावीन्यपूर्ण उपक्रम राबविणाऱ्या ‘जाई फाउंडेशन’, मुंबई द्वारा संचालित ‘शब्दवेल साहित्य मंच’, मुंबई यांचे तिसरे शब्दवेल साहित्य संमेलन विद्येचे माहेरघर पुणे येथे कॉस्मोपॉलिटिन एज्युकेशन सोसायटी यांच्या संयुक्त सहकार्याने रविवारी (ता. २१) व सोमवारी (ता. २२ जानेवारी २०२३) आझम कॅम्पस, असेम्ब्ली हॉल, छावणी परिसर, पुणे येथे आयोजित करण्यात आल्याची माहिती ‘शब्दवेल साहित्य मंच’चे अध्यक्ष प्रवीण बोपूलकर यांनी दिली.

विद्येच्या माहेरघरात होत असलेल्या या संमेलनाला ज्येष्ठ साहित्यिका, साहित्य अकादमी पुरस्काारप्राप्त लेखिका कवयित्री मा. आसावरी काकडे या अध्यक्षा, तर ९५ व्या अखिल भारतीय मराठी साहित्य संमेलनाचे अध्यक्ष मा. भारत सासणे उद्घाटक म्हणून लाभलेले आहेत. या संमेलनाच्या स्वागताध्यक्षपदी कॉस्मोपॉलिटिन एज्युकेशन सोसायटीचे अध्यक्ष मा. पी. ए. इनामदार, तर कार्याध्यक्ष म्हणून मा. मेहबूब कासार (राज्य कर उपआयुक्त, वस्तू व सेवा कर विभाग, मुंबई), प्रमुख अतिथी म्हणून मा. रेश्मा घाणेकर (राज्य कर सहआयुक्त, वस्तू व सेवा कर विभाग, पुणे), तर समारोपीय सोहळ्याचे अध्यक्ष म्हणून मा. पुष्पराज गावंडे (सदस्य, महाराष्ट्र राज्य साहित्य व संस्कृती मंडळ) यांची उपस्थिती असणार आहे.

याप्रसंगी केंद्रीय कार्यकारिणी सहसचिव रामदास गायधने, संघटनप्रमुख देवेंद्र इंगळकर, ‘शब्दवेल युथ विंग’चे अध्यक्ष अमोल चरडे, पुणे जिल्हाध्यक्षा विद्या अटक, उपाध्यक्षा नलिनी पवार, तांत्रिक विभागप्रमुख वैभव वऱ्हाडी आदी उपस्थित होते.

या दोनदिवसीय साहित्य संमेलनात उद्घाटन सोहळा, निमंत्रितांचे कविसंमेलन, परिसंवाद, प्रकट मुलाखत, गझल मुशायरा, वार्षिक पुरस्कार वितरण सोहळा अशा दर्जेदार कार्यक्रमांचे सत्रनिहाय आयोजन करण्यात आले आहे. साहित्यिकांनी आणि रसिकांनी जास्तीत जास्त संख्येने संमेलनास उपस्थित राहून दर्जेदार साहित्य मेजवानीचा आस्वाद घेण्याचे आवाहन ‘शब्दवेल साहित्य मंच’मार्फत करण्यात आलेले आहे.

‘न्यूज अनकट’ प्रतिनिधी : सतीश पाटील