अभिनेत्री पल्लवी जोशी अपघातात जखमी; प्रकृती स्थिर

हैदराबाद, १७ जानेवारी २०२३ : प्रसिद्ध अभिनेत्री आणि राष्ट्रीय पुरस्कार विजेत्या
पल्लवी जोशी यांचा अपघात झाला असून, या अपघातात त्या जखमी झाल्या आहेत. पती आणि दिग्दर्शक विवेक अग्निहोत्री यांच्या ‘द वॅक्सिन वॉर’ या आगामी चित्रपटाच्या शूटिंगदरम्यान त्यांचा अपघात झाला.

मिळालेल्या माहितीनुसार, हैदराबादमधील चित्रपटाच्या सेटवर सोमवारी ही घटना घडली. विवेक अग्निहोत्री ‘द वॅक्सिन वॉर’ या आगामी चित्रपटाचे हैदराबाद येथे चित्रिकरण करत आहेत. या सिनेमात त्यांच्या पत्नी पल्लवी जोशींसह नाना पाटेकर, अनुपम खेर अशी तगडी स्टारकास्ट आहे. सिनेमाच्या शूटिंगवेळी एका वाहनाने नियंत्रण गमावले आणि सेटवर शूटिंग करत असलेल्या पल्लवी जोशी यांना धडक दिली. यामध्ये पल्लवी यांना दुखापत झाली, मात्र त्यांनी काळजी घेत आधी आपला सीन पूर्ण केला आणि नंतर त्या उपचारासाठी रवाना झाल्या. सध्या त्यांच्यावर हैदराबादमधील स्थानिक रुग्णालयात उपचार सुरू असून त्यांची प्रकृती ठीक असल्याचे सांगण्यात येत आहे.

पल्लवी जोशी अनेक मराठी आणि हिंदी मालिका-चित्रपटांमध्ये काम केले आहे. इन्साफ की आवाज, अंधा युद्ध, दाता, सौदागर, तलाश, इन्सानियत, इम्तिहान आदी चित्रपटांमधील त्यांच्या भूमिका गाजल्या आहेत. तर ‘द कश्मीर फाईल्स’ या सिनेमात भूमिका साकारतानाच त्यांनी निर्मितीचीही जबाबदारी सांभाळली होती.

‘न्यूज अनकट’ प्रतिनिधी : प्रज्ञा फाटक.