आयपीएल मध्ये गुजरात टायटन्सची विजयी सलामी गतविजेत्यांचा चेन्नई सुपर किंग्सवर पाच गडी राखून विजय

अहमदाबाद, १ एप्रिल २०२३: चॅम्पियन संघाने चॅम्पियन्सप्रमाणे जेतेपदाचा बचाव करण्यास सुरुवात केली आहे. अहमदाबाद येथे आयपीएल २०२३ च्या पहिल्या सामन्यात गतविजेत्या गुजरात टायटन्सने चेन्नई सुपर किंग्जचा ५ गडी राखून पराभव केला. यासोबतच गुजरातची सीएसकेविरुद्धची विजयी मालिका नव्या सत्रातही कायम राहिली. शुभमन गिलची उत्कृष्ट खेळी आणि राशिद खानच्या अष्टपैलू कामगिरीच्या जोरावर हार्दिक पांड्याच्या संघाने २०व्या षटकाच्या दुसऱ्या चेंडूवर विजय मिळवला आणि चेन्नईविरुद्धच्या विजयाची हॅट्ट्रिक पूर्ण केली.

नवीन हंगामाच्या सुरुवातीची उत्सुकता अनेक दिवसांपासून कायम होती. यामागे अनेक कारणे होती आणि त्या सर्वांची एक छोटीशी झलक या सामन्यात पाहायला मिळाली. वर्षभरानंतर महेंद्रसिंग धोनीला पुन्हा मैदानावर पाहण्याची संधी चाहत्यांना मिळाली आणि धोनीनेही छोट्या खेळीने मनोरंजन केले. त्यानंतर, इम्पॅक्ट प्लेयरच्या नियमावर बरीच चर्चा झाली आणि ती या सामन्यातही पाहायला मिळाली.

आयपीएलचा दुसरा यशस्वी संघ सीएसके प्रथम फलंदाजीसाठी उतरला आणि त्यांना ७ विकेट्सवर केवळ १७८ धावा करता आल्या. सीएसकेसाठी सलामीवीर ऋतुराज गायकवाडने ५० चेंडूत सर्वाधिक ९२ धावा ठोकल्या. त्याच्याशिवाय इतर कोणत्याही फलंदाजाला चालता आले नाही.

लक्ष्याचा पाठलाग करताना गुजरातला शेवटच्या २ षटकात २८ धावांची गरज होती. दोन्ही संघातील तणाव वाढला होता. १९व्या षटकात रशीद खानने अवघ्या २ चेंडूत गुजरातचा विजय निश्चित केला. १९वे षटक दीपक चहरने टाकले आणि त्याच्या षटकाच्या चौथ्या चेंडूवर रशीदने मिडविकेटवर षटकार मारला आणि पुढच्याच चेंडूवर चौकार मारला. म्हणजेच २ चेंडूत १० धावा ठोकून त्याने चेंडू आणि धावांमधील फरक बराच कमी केला. या षटकानंतर गुजरातला विजयासाठी फक्त ८ धावांची गरज होती आणि हे अपूर्ण काम राहुल तेवतियाने पूर्ण केले.

‘न्यूज अनकट’ प्रतिनिधी : सूरज गायकवाड