‘महाराष्ट्रात दंगल भडकवण्याची प्रयोगशाळा सुरू’ संजय राऊत यांचा भाजपवर हल्लाबोल

नाशिक, १७ मे २०२३: ठाकरे गटाचे खासदार संजय राऊत यांनी भाजपवर जोरदार हल्ला चढवला असून, देशातील विविध भागात आणि महाराष्ट्रातील तणावपूर्ण वातावरणासाठी भाजपला जबाबदार धरले आहे. नाशिकमध्ये पत्रकारांशी बोलताना संजय राऊत म्हणाले की, सरकारच दंगल भडकावत आहे. विरोधक हे काम का करतील? कर्नाटकात त्यांचे सरकार होते. त्यांच्या सरकारच्या काळात दंगली का झाल्या? बिहारमध्येही त्यांनी दंगली घडवून आणल्या. मणिपूरमध्येही त्यांचे सरकार आहे आणि ते राज्य जळत आहे.

महाराष्ट्रातील अकोला, अहमदनगर आणि नाशिकमध्ये हिंसाचाराचे वातावरण आहे. त्यामुळे महाराष्ट्रातील राजकीय वातावरणही तापले आहे. मंगळवारी (१६ मे) संजय राऊत यांनी या ठिकाणी झालेल्या दंगलीवरून भाजपवर हल्लाबोल केला. संजय राऊत म्हणाले की, ‘भाजपने देशभरात तणाव निर्माण करण्याचा कारखाना सुरू केला असून महाराष्ट्रात दंगली भडकावण्याची प्रयोगशाळा सुरू झाली आहे.’

आपल्या प्रतिक्रियेत संजय राऊत म्हणाले की, सध्या महाराष्ट्रात अनैतिक युती करून सरकार स्थापन होत आहे. नजीकच्या भविष्यात लोक त्याला स्वीकारतील की नाही याची खात्री नाही. या भीतीपोटी त्यांनी देशभरात तणाव निर्माण करण्याचा कारखाना उघडला आहे. या कारखान्याची प्रयोगशाळा सध्या महाराष्ट्रात आहे.

कर्नाटक निवडणुकीत बजरंगबली, हनुमान चालीसा, बजरंगबली या नावांचा भरपूर वापर करण्यात आला. महाराष्ट्रातही उद्धव ठाकरे मुख्यमंत्री असताना त्यांच्या मातोश्री निवासस्थानाबाहेर हनुमान चालिसाचे पठण करण्याचा प्रयत्न झाला. राज्यात अस्थिरता आणून निवडणुकीपूर्वी जातीय तेढ निर्माण करून त्याच जोरावर मते मागायची सवय ते पुन्हा पुन्हा करत आहेत.

‘न्यूज अनकट’ प्रतिनिधी : सूरज गायकवाड