१ ऑक्टोबरपासून ऑनलाइन गेमिंगवर २८ टक्क्यांचा जीएसटी लागू होणार

नवी दिल्ली, ३ ऑगस्ट २०२३ : केंद्रीय अर्थमंत्री निर्मला सीतारामन यांनी बुधवारी सांगितले की, ऑनलाइन गेमिंगमधील संपूर्ण रकमेवर २८ टक्के कर लावण्याचा निर्णय १ ऑक्टोबरपासून लागू होईल. सीतारामन यांनी जीएसटी कौन्सिलच्या बैठकीनंतर पत्रकार परिषदेत सांगितले की, दिल्ली, गोवा आणि सिक्कीमने ऑनलाइन गेमिंग आणि कॅसिनोवर २८ टक्के कर लावण्याच्या निर्णयाचा आढावा घेण्याची मागणी केली आहे. इतर राज्यांनी त्याची अंमलबजावणी करण्याबाबत तयारी दर्शवली आहे, त्यामुळे हा निर्णय लागू करण्याचा निर्णय घेण्यात आला.

GST परिषदेत वस्तू आणि सेवा करावर निर्णय घेणारी सर्वोच्च संस्था, केंद्रीय अर्थमंत्री आणि सर्व राज्यांचे प्रतिनिधी यांचा समावेश आहे. ऑनलाइन गेमिंगवर कर आकारणीसाठी आवश्यक असलेल्या दुरुस्तीच्या शब्दरचनेवर बैठकीत चर्चा झाली. गेल्या महिन्यात झालेल्या कौन्सिलच्या बैठकीत ऑनलाइन गेमिंग, कॅसिनो आणि घोड्यांच्या शर्यतींमध्ये लागणाऱ्या संपूर्ण रकमेवर २८ टक्के दराने जीएसटी लावण्याचा निर्णय घेण्यात आला.

गेल्या बैठकीत घेतलेल्या निर्णयाची अंमलबजावणी व्हावी, अशी कर्नाटक, गुजरात, महाराष्ट्र आणि उत्तर प्रदेशसह अन्य राज्यांची इच्छा असल्याचे अर्थमंत्र्यांनी सांगितले. या संदर्भात केंद्र आणि राज्याच्या कायद्यांमध्ये आवश्यक बदल केल्यानंतर ऑनलाइन गेमिंगवरील नवा कर १ ऑक्टोबरपासून लागू होण्याची शक्यता आहे. अर्थमंत्र्यांनी सांगितले की, कर लागू झाल्यानंतर सहा महिन्यांनी त्याचा आढावा घेतला जाईल.

न्यूज अनकट प्रतिनिधी : सूरज गायकवाड