कोल्हापूर, १४ ऑगस्ट २०२३ : स्वातंत्र्य दिनाच्या एक दिवस आधीच एनआयएने कोल्हापुरात मोठी कारवाई केली आहे. एनआयएने कोल्हापुरात तीन ठिकाणी छापेमारी करून तीन संशयितांना ताब्यात घेतले आहे. या तिघांचाही दहशतवादी संघटनांशी संबंध असल्याचे सांगितले जात आहे. विशेष म्हणजे स्थानिक पोलिसांना कल्पना न देता एनआयएने ही कारवाई केली. कोल्हापुरातून तीन जणांना ताब्यात घेण्यात आल्याने एकच खळबळ उडाली आहे. या तिघांचा नेमका हेतू काय होता? अशी चर्चा आता कोल्हापुरात रंगली आहे.
एनआयएने पाच राज्यात १४ ठिकाणी छापेमारी केली आहे. राज्यातही पाच ठिकाणी छापेमारी केली आहे. राज्यात कोल्हापूर आणि नाशिकमध्ये ही छापेमारी करण्यात आली आहे.एकट्या कोल्हापुरातच तीन ठिकाणी छापे मारले आहेत. कोल्हापुरामध्ये कोल्हापूर, इचलकरंजी आणि हुपरी या ठिकाणी एनआयएने छापेमारी केली. पोलिसांना कल्पना न देता अचानक ही छापेमारी करण्यात आली आहे. या प्रकरणी एनआयएने तीनजणांना ताब्यात घेतले आहे. हे तिघे संशयित दहशतवादी संघटनांशी संबंधित असल्याचा एनआयएचा संशय आहे.
कोल्हापुरातील छापेमारीत एनआयएला महत्त्वाच्या गोष्टी हाती लागल्याचे सांगितले जात आहे. संशयास्पद कागदपत्रे, इलेक्ट्रॉनिक वस्तू आणि लोखंडी शस्त्रे एनआयएने जप्त केल्याचे सांगितले जात आहे. स्थानिक पोलिसांना कल्पना न देता एनआयए पथकाने ही गोपनीय कारवाई केली आहे. एनआयएने आधी काही लोकांची चौकशी केली त्यानंतर ही छापेमारी केली आहे. तिघांना अटक करण्यात आली असून या तिघांची कसून चौकशी करण्यात येणार आहे.
न्यूज अनकट प्रतिनिधी : अनिल खळदकर
