पिंपळे सौदागर येथे महिलेसमोर रिक्षाचालकाचे हस्तमैथुन

पुणे: एका अज्ञात रिक्षा चालकाने समोर असलेल्या महिलेसमोर हस्तमैथुन केल्याची धक्कादायक घटना पुढे आली आहे.
यांबाबत अधिक माहिती अशी की, पिंपरी-चिंचवडमधील पिंपळे सौदागर येथे ही घटना घडली. सांगवी पोलिसांनी फिर्यादीने दिलेल्या तक्रारीवरुन अज्ञात रिक्षाचालकाविरुद्ध गुन्हा दाखल केला आहे. एम.एच-१२ क्यू.आर-१४७१ क्रमांकाच्या रिक्षात असलेल्या रिक्षाचालकाने अशा प्रकारचे कृत्य केल्याचा फिर्यादीचा दावा आहे. पोलिसांनी या क्रमांकाची रिक्षा आणि रिक्षाचालकाचा कसून शोध सुरु केला आहे.
फिर्यादी महिला आपल्या पतीसोबत सोसायटीच्या फाटकाजवळ असलेल्या दुकानात पाव खरेदी करण्यासाठी गेली होती. फिर्यादी महिला या दुकानात पाव खरेदी करत होती तर, तिचा पती जवळच्याच दुकानात दूध आणण्यासाठी गेला होता. या वेळी रिक्षाचालकाने तिच्याकडे पाहून हस्तमैथुन करण्यास सुरवात केली. सुरवातीला पीडितेने त्याकडे दुर्लक्ष केले. मात्र, तरीही त्याने हा प्रकार सुरुच ठेवला. अखेर पीडित महिलेने आपल्या पतीस बोलावण्याचा प्रयत्न केला. मात्र, रिक्षाचालकाने तोपर्यंत घटनास्थळावरुन पोबारा केला होता.

तसेच पीडिता दुसऱ्या दिवशी आपल्या मैत्रिणीसोबत कॉफी शॉपवर गप्पा मारत थांबली होती. याही वेळी तोच रिक्षावाला पुन्हा त्याच रिक्षातून तिथे आला. त्याने पुन्हा पीडितेकडे पाहून अश्लील हावभाव आणि हस्तमैथुन करण्यास सुरुवात केली. त्यानंतर पीडितेने आणि तिच्या मैत्रिणींनी संबंधीत रिक्षाचा क्रमांक नोंदवून घेतला. त्यानंतर पोलिसांत फिर्याद दिली.

पीडितेने दिलेल्या फिर्यादीवरुन सांगवी पोलिसांनी गुन्हा दाखल केला असून, त्या विकृत रिक्षाचालकाचा कसून तपास सुरु केला आहे. दरम्यान, एम.एच-१२ क्यू.आर-१४७१ क्रमांकाची रिक्षा कोणाला आढळल्यास सांगवी पोलीस ठाण्याशी संपर्क करावा, असे अवाहन सांगवी पोलीस ठाणे वरिष्ठ पोलीस निरीक्षक ज्ञानेश्वर साबळे यांनी केले आहे.