जालन्याच्या जाफराबाद टेंभूर्णी रोडवर दुचाकीचा अपघात, दोघे जण जागेवर ठार

जालना ७ मार्च २०२४ : जालन्याच्या जाफ्राबाद तालुक्यातील टेंभुर्णी- जाफराबाद रोडवरील आळंद फाट्याजवळील जंजिरा हॉटेल समोर दुचाकींची समोरासमोर धडक होऊन अपघात झाला. या अपघातात दोघांचा जागीच मृत्यू झालाय, तर दोघे गंभीर जखमी झाले. अपघातात समोरासमोर धडक होऊन अपघातानंतर पेटलेली एक दुचाकी जळून खाक झाली. अंकुश रमेश शेळके (रा.भातोडी ता. जाफराबाद), चरणसिंग रामसिंग लखवाल (रा.अचली डावरगाव, ता. सिंदखेडराजा) अशी मृतांची नावे आहेत. तर शरद उगले आणि संतोष ब्रह्मणवत हे दोघे गंभीर जखमी आहे.

भातोडी येथील अंकुश शेळके व शरद उगले हे दोघे मंगळवारी सायंकाळी दुचाकीवरून भातोडीकडे जात होते. त्याचवेळी विरुद्ध दिशेने चरणसिंग लखवाल व संतोष ब्रह्मणावत हे दुचाकीवरून येत होते. सदरील घटनेची माहिती कळताच टेंभुर्णी पोलिस ठाण्याचे सपोनि, सचिन खामगळ यांनी कर्मचाऱ्यांसह घटनास्थळी धाव घेतली. त्या ठिकाणी पोलिस व टेंभुर्णी येथील कपिल जाधव व अन्य युवकांनी मृत व जखमींना गाडीत टाकून ग्रामीण रुग्णालयात आणले. त्या ठिकाणी वैद्यकीय अधिकारी डॉ.अमोल वाघ यांनी दोघांना तपासून मृत घोषित केले. तर अन्य दोघांना पुढील उपचारासाठी जालना येथे पाठवण्यात आले. दरम्यान या दुर्दैवी घटनेमुळे परिसरात हळहळ व्यक्त केली जातेय.

न्युज अनकट प्रतिनिधी : विजय साळी