पुणे, २५ फेब्रुवारी २०२५: कोथरूडमध्ये मध्यरात्री घडलेल्या एका भयंकर घटनेने पुणे शहराला हादरवून सोडले आहे. कुख्यात गुंड गजानन मारणेच्या टोळीतील सदस्यांनी भररस्त्यात एका २२ वर्षीय तरुणावर गोळीबार करत, तलवार आणि कोयत्याने सपासप वार करून त्याची निर्घृण हत्या केली. या घटनेमुळे संपूर्ण कोथरूड परिसरात भीतीचे वातावरण पसरले असून, पोलिसांनी आरोपींच्या मुसक्या आवळण्यासाठी जोरदार मोहीम सुरू केली आहे.
गुन्हेगारांना पोलिसांचा ‘दणका’: धिंड काढत चोप!
या घटनेतील मुख्य आरोपी ओम धर्मजिज्ञासू किरण पडवळ आणि अमोल तापकीर यांना कोथरूड पोलिसांनी अटक केली असून, त्यांची जनतेसमोर धिंड काढत चांगलाच धडा शिकवला आहे. या टोळीच्या गुन्हेगारी कृत्यांमुळे स्थानिक नागरिक दहशतीखाली होते. मात्र, पोलिसांनी कठोर कारवाई करत या गुंडांना रस्त्यावर फिरवून एक कडक संदेश दिला आहे. या प्रकरणात तिन्ही आरोपींना न्यायालयाने पोलीस कोठडी सुनावली आहे.
गजा मारणेही अडचणीत; ‘मोक्का’ अंतर्गत कारवाईची शक्यता!
या गुन्ह्याच्या तपासादरम्यान गजा मारणे याच्यावरही आरोपी म्हणून गुन्हा दाखल करण्यात आला आहे. यापूर्वीही त्याच्यावर २८ गंभीर गुन्हे दाखल आहेत. दोन वेळा तडीपार होऊनही त्याने पुन्हा गुन्हेगारीचा मार्ग पत्करल्यामुळे, आता त्याच्यावर ‘मोक्का’ अंतर्गत कठोर कारवाई होण्याची शक्यता आहे.
‘गुन्हेगारीचा मार्ग सोडा, अन्यथा ठोकून काढू’ – पोलीस आयुक्तांचा इशारा!
पोलीस आयुक्त अमितेश कुमार यांनी गुन्हेगारांना स्पष्ट शब्दांत इशारा दिला आहे. “कोणताही गुन्हेगार शांत असेल, तर आम्ही त्याला काही करणार नाही. मात्र, किरकोळ गुन्हाही केला, तर त्यावर १०० टक्के अधिक कठोर कारवाई केली जाईल. मुख्य प्रवाहात यायचे असेल, तर गुन्हेगारी सोडा, अन्यथा आम्ही कडक कारवाई करू.”
विशेष डेस्कद्वारे जनतेला पोलिसांचा आधार!
शहरात दहशत माजवणाऱ्या टोळ्यांविरोधात पोलिसांनी विशेष डेस्क सुरू केला आहे. नागरिक थेट पोलीस उपायुक्तांकडे तक्रार नोंदवू शकतात. तक्रारीची तात्काळ दखल घेऊन आरोपींवर कारवाई केली जाईल.
राजकीय वरदहस्ताचा फायदा घेत टोळीचा विस्तार!
गजा मारणे आणि त्याच्या साथीदारांनी राजकीय वरदहस्ताचा फायदा घेत गुन्हेगारीचे जाळे निर्माण केले आहे. काही नेत्यांच्या मदतीने त्याने आपली गुंडगिरी टिकवून ठेवली होती. मात्र, आता पोलिसांनी या टोळीला नेस्तनाबूत करण्याचा निर्धार केला आहे.
पोलिसांचे धडक अभियान सुरू; गुन्हेगारी संपवण्यासाठी सज्ज!
या घटनेनंतर पुणे पोलिसांनी सर्व गुन्हेगारांविरोधात कठोर पावले उचलण्यास सुरुवात केली आहे. ‘मोक्का’ अंतर्गत कारवाईसाठी आवश्यक कागदपत्रे तयार करण्यात येत आहेत. तसेच, फरार आरोपींना पकडण्यासाठी पोलिसांची विशेष पथके तैनात करण्यात आली आहेत. या प्रकरणात आणखी मोठे खुलासे होण्याची शक्यता असून, पोलिसांचे पुढील पाऊल काय असेल याकडे संपूर्ण शहराचे लक्ष लागले आहे.
न्यूज अनकट प्रतिनिधी – सोनाली तांबे
