Shiv Chhatrapati State Sports Awards announced: माजी राष्ट्रीय कबड्डीपटू व संघटक शंकुतला खटावकर यांना जीवनगौरव तर पॅरा ऑलिम्पिक पदक विजेता सचिन खिलारी, जागितिक विजेते आर्चर आदिती स्वामी,ओजस देवतळे यांना शिवछत्रपती राज्य क्रीडा थेट पुरस्काराने गौरवण्यात येणार आहे. क्रीडा व युवक कल्याण मंत्री दत्तात्रय भरणे यांनी शिवछत्रपती राज्य क्रीडा पुरस्कार जाहीर झालेल्या मान्यवरांची मंगळवारी मंत्रालयात घोषणा केली. यावेळी एकूण ८९ पुरस्कारांची घोषणा करण्यात आली.
पुण्यातील म्हाळूगे येथील बालेवाडी शिवछत्रपती क्रीडा संकुलनात १८ एप्रिल रोजी सकाळी ११ वाजता महाराष्ट्राचे राज्यपाल सी.पी राधाकृष्णन यांच्या हस्ते पुरस्कारचे वितरण करण्यात येणार आहे. यावेळी अप्पर मुख्य सचिव अनिल डिग्गीकर व क्रीडा आयुक्त हिरालाल सोनवणे यांची प्रमुख उपस्थिती असणार आहे. याशिवाय मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजीत पवार, केंद्रिय राज्यमंत्री मुरलीधर मोहोळ, उच्च व तंत्रशिक्षण मंत्री चंद्रकांत पाटील, क्रीडामंत्री दत्तात्रय भरणे, विधान सभेच्या उपसभापती डॉ. नीलम गोर्‍हे, राज्यमंत्री माधुरी मिसाळ आदी मान्यवर उपस्थित रहाणार आहे. सन २०२२-२३ व २०२३-२४ अशा दोन वर्षांच्या पुरस्कार समारंभाची तयारी सुरू करण्यात आली असल्याची माहिती राज्याचे क्रीडा सहसंचालक सुधीर मोरे यांनी पत्रकरांना पत्रकार परिषदेत दिली.
पुढे ते म्हणाले की, राज्यात क्रीडा संस्कृतीचा वारसा जपला जावा, त्याचे संवर्धन व्हावे याबरोबर क्रीडा क्षेत्रात उल्लेखनीय कार्य करणाऱ्या क्रीडा महर्षी, मार्गदर्शक, खेळाडूंच्या कार्याचा गौरव करण्यासाठी शिवछत्रपती राज्य क्रीडा पुरस्कार देण्यात येतो. यावर्षीचा पुरस्कार समारंभ पुण्यात दिमाखदार स्वरूपात प्रदान करण्यात येणार आहे.
प्रथमच महिला खेळाडूला प्राप्त :
२००१ पासून शिव छत्रपती राज्य क्रीडा जीवनगौरवाची सुरुवात झाली असून पुरस्कार सुरू झाल्यापासून यंदा पहिल्यांदा महिला खेळाडू शकुंतला खटावकर या त्याच्या मानकरी ठरल्या आहेत. १९७९ ते १९८२ या कालावधीत १०६ राष्ट्रीय कबड्डी लढती खेळण्याचा विक्रम शकुंतला खटावकर यांच्या नावावर आहे. त्यांनी राष्ट्रीय स्पर्धेत आतापर्यंत तब्बल ८ वेळा महाराष्ट्रासाठी जीतेपद जिंकले आहेत. याशिवाय त्यांना १९७८ मध्ये केंद्र शासनाच्या अर्जून पुरस्काराने सन्मानित करण्यात आले होते.
न्यूज अनकट प्रतिनिधी,प्रथमेश पाटणकर
