Counterfeit currency racket busted in Pune: पुणे शहरात बनावट नोटा छापणाऱ्या एका मोठ्या टोळीचा शिवाजीनगर पोलिसांनी पर्दाफाश केला आहे. सायबर पथकाने केलेल्या धाडसी कारवाईत तब्बल २८ लाख ६६ हजार १०० रुपयांच्या बनावट नोटा जप्त करण्यात आल्या आहेत. यासोबतच २ लाख ४ हजार रुपयांच्या खऱ्या नोटा आणि नोटा छापण्याचे अत्याधुनिक साहित्यही पोलिसांच्या हाती लागले आहे. याप्रकरणी पोलिसांनी पाच जणांना बेड्या ठोकल्या असून, या घटनेने शहरात खळबळ उडाली आहे.
या गुन्ह्याची सुरुवात १७ एप्रिल रोजी झाली, जेव्हा कोटक महिंद्रा बँकेच्या एटीएममध्ये २०० रुपयांच्या ५५ बनावट नोटा जमा झाल्याचे उघडकीस आले. शिवाजीनगर पोलिसांनी तातडीने याप्रकरणी गुन्हा दाखल करून तपासाला सुरुवात केली. तांत्रिक विश्लेषणाच्या आधारे पोलिसांनी १८ एप्रिल रोजी मनिषा स्वप्निल ठाणेकर (वय, पत्ता), भारती गवंड (वय, पत्ता) आणि सचिन रामचंद्र यमगर (वय, पत्ता) या तिघांना ताब्यात घेतले.
आरोपींच्या कसून चौकशीनंतर या बनावट नोटांच्या रॅकेटचा मुख्य सूत्रधार नरेश भीमप्पा शेट्टी (वय, पत्ता) असल्याचे समोर आले. पोलिसांनी तत्काळ लोहगाव येथे नरेशच्या घरी धाड टाकली. या कारवाईत पोलिसांना बनावट नोटांचा मोठा साठा सापडला. २०० रुपयांच्या २० बंडल नोटा (अंदाजे ४ लाख रुपये), ५०० रुपयांच्या ए-४ आकाराच्या कागदांवर छापलेल्या २२३२ बनावट नोटा (अंदाजे २२.३२ लाख रुपये), एक प्रिंटर, शाई आणि कोरे कागद पोलिसांनी जप्त केले.
इतकेच नव्हे, तर पोलिसांनी नरेशच्या कारची झडती घेतली असता, त्यातही २०० रुपयांच्या ६४८ बनावट नोटा आणि ५०० रुपयांच्या ३ बनावट नोटा आढळून आल्या. या टोळीच्या तपासात प्रभू गुगलजेड्डी नावाच्या आणखी एका व्यक्तीचा सहभाग उघड झाला असून, त्यालाही अटक करण्यात आली आहे. त्याच्याकडूनही बनावट नोटा जप्त करण्यात आल्या आहेत.
वरिष्ठ पोलिस निरीक्षक महेश बोळकोटगी, तत्कालीन पोलिस निरीक्षक चंद्रशेखर सावंत आणि पोलिस निरीक्षक चंद्रकांत सूर्यवंशी यांच्या मार्गदर्शनाखालील पथकाने ही यशस्वी कारवाई केली. या कारवाईमुळे बनावट नोटांच्या माध्यमातून होणारे संभाव्य मोठे आर्थिक नुकसान टळले आहे. पोलीस आता या टोळीच्या मुळाशी जाऊन आणखी काही धागेदोरे हाती लागतात का, याचा तपास करत आहेत.
न्यूज अनकट प्रतिनिधी, सोनाली तांबे
