पुणे महापालिकेच्या आगामी निवडणुकीसाठी अत्यंत महत्त्वाच्या असलेल्या प्रारूप प्रभाग रचनेच्या अंतिम अहवालाचे सादरीकरण आज, शुक्रवारी (दि. २६) दुपारी तीन वाजता राज्य निवडणूक आयोगासमोर होणार आहे. या महत्त्वपूर्ण सादरीकरणासाठी महापालिका आयुक्त, अतिरिक्त आयुक्त आणि निवडणूक विभागाचे उपायुक्त मुंबई येथील आयोगाच्या कार्यालयात हजर राहणार आहेत. महापालिकेच्या निवडणुकीच्या दृष्टीने हा अत्यंत महत्त्वाचा टप्पा मानला जात आहे.
यापूर्वी, महापालिकेच्या ४१ प्रभागांवर आलेल्या तब्बल ५,९२२ हरकती आणि सूचनांवर आयएएस अधिकारी व्ही. राधा यांच्या अध्यक्षतेखाली सुनावणी घेण्यात आली होती. सुनावणीसाठी प्रत्यक्षात केवळ ८२८ नागरिक उपस्थित राहिले. प्रभाग क्र. २४, ३४, ३८ आणि १९ मधून सर्वाधिक हरकतदार आले होते. सुनावणीनंतरचा अहवाल नगरविकास विभागामार्फत राज्य निवडणूक आयोगाकडे पाठवण्यात आला होता.
आता आयोगासमोर सादरीकरण झाल्यानंतर, नगरविकास विभागाने दिलेल्या वेळापत्रकानुसार ३ ते ६ ऑक्टोबर या कालावधीत आयोगाकडून ही अंतिम प्रभाग रचना निश्चित केली जाईल आणि महापालिकेकडे जाहीर करण्यासाठी पाठवली जाईल. यानंतर, अवघ्या आठवड्याभरात प्रभागांच्या आरक्षणाची सोडत काढली जाईल.
या सर्व प्रक्रियेमुळे दिवाळीपूर्वीच पुणे महापालिकेच्या निवडणुकीसाठी इच्छुक असलेल्या उमेदवारांना अंतिम प्रभाग रचना आणि आरक्षणाचे नेमके चित्र स्पष्ट होणार आहे. त्यामुळे, आता सर्वांचे लक्ष आजच्या सादरीकरणाकडे आणि त्यानंतर ४ ऑक्टोबरला होणाऱ्या अंतिम घोषणेकडे लागले आहे.
न्यूज अनकट प्रतिनिधी सोनाली तांबे
