नवी दिल्ली, दि. २३ जून २०२० : लडाखमध्ये चीनच्या सीमेवरचा तणाव लक्षात घेता अंतर्गत सुरक्षा आणि कोविड १९ मध्ये तैनात असलेले आयटीबीपी जवानांना आता वास्तविक नियंत्रण रेषेत (एलएसी) पाठविण्यात येणार आहे. गृह मंत्रालय लवकरच या संदर्भात निर्णय घेऊ शकेल. सूत्रांच्या माहितीनुसार, आयटीबीपीच्या ३५ तुकड्या अंतर्गत सुरक्षा आणि कोरोना साथीच्या संबंधित विविध कामांमध्ये तैनात आहेत.
एलएसीवर आयटीबीपीच्या जवानांच्या तैनात वाढण्याबरोबरच सीमेवर अधिक दक्षता वाढविण्याची तयारीही आहे. यापूर्वी जम्मू-काश्मीरमध्ये अंतर्गत सुरक्षेसाठी तैनात असलेल्या १५ तुकड्या लडाखला पाठवण्यात आल्या आहेत. सूत्रांच्या माहितीनुसार आता अंतर्गत सुरक्षेत गुंतलेल्या एकूण ५० आयटीबीपी तुकड्या आता एलएसीकडे पाठवल्या जातील.
दरम्यान, लष्करप्रमुख मनोज मुकुंद नरवणे मंगळवारी दोन दिवसांच्या लेह दौर्यावर आहेत. तेथे ते एलएसीच्या सद्य परिस्थितीचा आढावा घेतील. यासह ते जखमी सैनिकांना भेटणार आहेत. सूत्रांच्या माहितीनुसार सोमवारी मोल्दो येथे झालेल्या दोन देशातील लष्करी कमांडर्स यांच्यात झालेल्या ११ तासांच्या चर्चेत तणाव कमी करण्यावर सहमती दर्शविली गेली, परंतु तणाव कमी करण्यासाठी सध्याच्या परिस्थितीपासून दोन्ही देशांचे सैन्य कसे मागे हटेल, हा मार्ग अद्याप सापडलेला नाही. सध्या एलएसी वरून तोफखाना आणि सैन्य उपकरणे मागे घेण्याचे मान्य केले आहे.
सूत्रांच्या माहितीनुसार, चीनच्या हालचालीवर लक्ष ठेवण्यासाठी आयटीबीपीच्या जवानांनी अनेक ठिकाणी एलआरपी (लाँग रेंज पेट्रोलिंग) आणि एसआरपी (शॉर्ट रेंज पेट्रोलिंग) ची संख्या वाढविली आहे. सीमेवर चीनच्या प्रत्येक हालचालीवर लक्ष ठेवले जात आहे.
न्यूज अनकट प्रतिनिधी
