कोलकाता (वृत्तसंस्था) : भारतामध्ये पहिल्यांदाच डे नाइट कसोटी सामना खेळवण्यात येणार आहे. या ऐतिहासिक सामन्यासाठी भारतीय संघ, कोलकातावासिय, बीसीसीआय सारेच सज्ज झाले आहेत.
ऐतिहासिक सामन्याच्या काही तासांपूर्वी बीसीसीआयने एक व्हिडीओ आपल्या ट्विटर हँडलवर पोस्ट केला आहे. या व्हिडीओमध्ये बीसीसीआयचे अध्यक्ष सौरव गांगुली, भारताता कर्णधार विराट कोहली, रोहित शर्मा, मयांक अगरवाल, मोहम्मद शमी, इशातं शर्मा, उमेश यादव, वृद्धिमान साहा, कुलदीप यादवसारखे बरेच क्रिकेटपटू आहेत.
या सर्व खेळाडूंनी चाहत्यांना या सामन्यासाठी सज्ज होण्याचे आवाहन केल्याचे पहायला मिळत आहे.
भारत आणि बांगलादेश यांच्यामध्ये उद्यापासून पहिल्या डे नाइट टेस्ट मॅचला सुरुवात होणार आहे. भारतामध्ये पहिल्यांदाच डे नाइट टेस्ट मॅच खेळवण्यात येणार आहे. पण यापूर्वीही भारताची एक डे नाइट टेस्ट मॅच होणार होती. पण या मॅचचे नेमके काय झाले, याबाबत कोहलीने आपले मत व्यक्त केले आहे.
या सामन्याबाबत कोहलीने सांगितले की, डे – नाइट कसोटी खेळणे सोपे नसते. या सामन्यांमध्ये गुलाबी चेंडू वापरला जातो. या चेंडूचा तुम्हाला चांगला सराव असेल तरच तुम्ही डे नाइट टेस्ट खेळू शकता. ही गोष्ट पटकन स्वीकारण्यासारखी नक्कीच नाही. जर ही गोष्ट फार पूर्वी ठरली असती तर आम्ही विनंती स्वीकारून डे नाइट टेस्ट मॅच खेळलो असतो. पण ऐनवेळी या गोष्टी ठरवून होणार नाही.असेही त्याने सांगितले.
