अँबेसिडर कार पुन्हा दिसणार रस्त्यावर, होणार नव्या अवतारात लॉन्च!

पुणे, 28 मे 2022: भारतातील सत्ता आणि राजकारणाचे प्रतीक मानली जाणारी अॅम्बेसेडर कार लवकरच पुनरागमन करणार आहे. म्हणजेच, तिचे वैभव आणि दर्जा पुन्हा रस्त्यांवर दिसणार आहे, परंतु यावेळी ही कार पूर्णपणे नवीन अवतारात लॉन्च केली जाईल आणि भविष्यानुसार तयार केली जाईल.

युरोपियन कार कंपनीशी करार

अँबेसिडर निर्माता हिंदुस्थान मोटर्सने युरोपियन ऑटोमोबाईल कंपनीसोबत सामंजस्य करार केला आहे. युरोपियन भागीदाराचे नाव अद्याप उघड करण्यात आलेले नाही, परंतु असे मानले जाते की हा करार प्यूजिओसोबत केला गेला आहे. या सामंजस्य करारानुसार, दोन्ही कंपन्या पुन्हा एकदा कंपनीच्या उत्तरपारा प्लांटमध्ये कार आणि स्कूटरचे उत्पादन सुरू करतील.

यावेळी अँबेसिडर इलेक्ट्रिक अवतारात परत येईल, पण त्याआधी कंपनी इलेक्ट्रिक टू-व्हीलर बनवायला सुरुवात करेल. हिंदुस्थान मोटर्सचे संचालक उत्तम बोस सांगतात की, नवीन ‘अँबी’चे डिझाईन, नवा लुक आणि इंजिन यासाठी काम सुरू आहे. ते आधीच प्रगत अवस्थेत आहे.

देशातील सर्वात जुना कार प्लांट

कोलकाता पासून सुमारे 20 किमी अंतरावर असलेला उत्तरपारा कार प्लांट हा देशातील सर्वात जुना कार प्लांट आहे. तर जपानमधील टोयोटाच्या प्लांटनंतर हे आशियातील दुसरे सर्वात जुने प्लांट आहे. हिंदुस्थान मोटर्सची अँबेसिडर 1970 पर्यंत भारतातील रस्त्यांवर राज्य करत होती. नंतर मारुती सुझुकी सारख्या कंपन्यांची स्वस्त वाहने आल्यामुळे बाजारात तिची मागणी कमी होऊ लागली. अखेर 2014 मध्ये कंपनीने तिचे उत्पादन बंद केले.

1948 पासून येथे कार बनवली जात आहे
उत्तरपारा प्लांटमध्ये उत्पादन 1948 मध्ये सुरू झाले, परंतु कंपनीचे सर्वात लोकप्रिय कार मॉडेल, अँबेसिडर, 60 च्या दशकात प्रथम भारतीय रस्त्यावर आले. हे कंपनीने 1957 मध्ये लॉन्च केले होते. ऑक्टोबर 2014 मध्ये जेव्हा कंपनीने हा प्लांट बंद केला तेव्हा त्यात 2300 कर्मचारी काम करत होते. आता त्यांची संख्या केवळ 300 झाली आहे.

कंपनीचे उत्तरपाडा येथे 275 एकर क्षेत्रफळ आहे, ज्यामध्ये 90 एकरमध्ये पसरलेल्या या प्लांटचा समावेश आहे. अंदाजानुसार, युरोपियन कंपनीशी हा करार सुमारे 600 कोटींचा आहे आणि त्यातील बहुतांश हिस्सा हिंदुस्थान मोटर्सकडे असणार आहे.

न्यूज अनकट प्रतिनिधी: ईश्वर वाघमारे