एनडीएला आणखी एक झटका, जीजेएम’चा ममतांसोबत निवडणूक लढविण्याचा निर्णय

कोलकाता, २२ ऑक्टोबर २०२०: बिहार विधानसभा निवडणुकीच्या पार्श्वभूमीवर भारतीय जनता पक्षाच्या नेतृत्वाखालील एनडीएला आणखी एक धक्का बसला आहे. गेल्या तीन वर्षांपासून गायब असलेले गोरखा जनमुक्ती मोर्चाचे नेते बिमल गुरुंग बुधवारी अचानक कोलकाता येथे हजर झाले आणि त्यांनी जाहीर केले की ते एनडीए सोडत आहेत आणि २०२१ च्या बंगालमधील विधानसभा निवडणुकांपूर्वी तृणमूल काँग्रेसशी युती करतील.

कोलकाताच्या सॉल्ट लेक भागात गुरखा भवनाच्या बाहेर बिमल गुरुंग दिसले. ते येथे सर्वप्रथम गोरखा भवनात गेले जेथे बाहेरील लोकांना आत जाऊ दिले जात नाही. त्यानंतर त्यांनी भाजपने राज्यासाठी काहीही केले नाही असा आरोप केला. गोरखालँड संदर्भातील आमच्या सर्व मागण्या अद्याप मान्य केल्या नाहीत.

बिमल गुरुंग यांनी भारतीय जनता पक्षावर आरोप करत म्हणाले, ‘भाजपाने जे वचन दिले होते ते पूर्ण केले नाही, परंतु ममता बॅनर्जी यांनी आपली सर्व आश्वासने पाळली. म्हणून मी स्वत:ला एनडीएपासून वेगळे करू इच्छितो.

बिमल गुरुंग यांच्यावर २०१७ मध्ये राज्यातील कलिम्पोंग पोलिस ठाण्यावर ग्रेनेड हल्ला आणि दार्जिलिंगच्या चौक बाजार भागात झालेल्या स्फोट प्रकरणी अनलॉफुल एक्टिविटीज (प्रिवेंशन) एक्ट यूएपीएअंतर्गत गुन्हा दाखल करण्यात आला होता आणि तेव्हापासून ते फरार आहेत.

‘पंतप्रधान मोदी-शहा यांनी आश्वासन पूर्ण केले नाही’

गोरखा जनमुक्ती मोर्चाच्या नेत्याने पत्रकार परिषदेत पंतप्रधान नरेंद्र मोदी आणि अमित शहा यांच्यावर हल्ला चढविला आणि ते म्हणाले की बंगालमध्ये गोरखा सोबत केलेली आश्वासने पूर्ण करण्यात हे लोक अपयशी ठरले आहेत. या नंतर त्यांनी एनडीए सोडल्याचे स्पष्ट केले.

बिमल गुरुंग म्हणाले, ‘भाजपने दार्जिलिंग टेकड्यांचा कायमस्वरुपी तोडगा काढला जाईल आणि ११ गोरखा जमातींना अनुसूचित जमातीच्या रुपात मान्यता देईल असे म्हटले होते, परंतु पक्ष आपले वचन पाळण्यात अपयशी ठरला.’ ते म्हणाले की, जीजेएम अजूनही गोरखालँडसाठी वचनबद्ध आहे आणि २०२४ लोकसभा निवडणुकीत हा मुद्दा उपस्थित करणाऱ्या पक्षाला आम्ही पाठिंबा देऊ.

यासह ते म्हणाले की, २०२१ च्या बंगाल विधानसभा निवडणुकीत आम्ही तृणमूल काँग्रेस (टीएमसी) बरोबर युती करू आणि भाजपाला योग्य उत्तर देऊ. बिमल गुरुंग यांच्या या निर्णयानंतर असे मानले जाते की उत्तर बंगालच्या डोंगराळ भागातील किमान १० जागांचा भाजपाच्या मतपेढीवर परिणाम होऊ शकतो. बिहार विधानसभा निवडणुकीच्या आधी एलजेपीने एनडीएपासून स्वतंत्र होण्याची आणि निवडणूक लढवण्याची घोषणा केली होती.

न्यूज अनकट प्रतिनिधी: ईश्वर वाघमारे