अरुणाचल प्रदेशमध्ये कोसळले लष्कराचे हेलिकॉप्टर

इटानगर, २१ ऑक्टोबर २०२२: अरुणाचल प्रदेशमध्ये शुक्रवारी सकाळी एक मोठी दुर्घटना घडली. अप्पर सियांग जिल्ह्यातील येथील टुटिंग मुख्यालयापासून २५ किमी अंतरावर सिंगिंग गावाजवळ लष्करी हेलिकॉप्टर कोसळले.

गुवाहाटी डिफेन्स पीआरओकडून मिळालेल्या माहितीनुसार, आज सकाळी १० वाजून ४० मिनिटांनी हा अपघात झाला. दरम्यान, हा अपघात ज्या ठिकाणी झाला आहे, त्या ठिकाणी जाण्यासाठी रस्ता नाही. अशा परिस्थितीत बचावकार्य करण्यातही अडचणी येत आहेत. मात्र, घटनास्थळी बचाव पथक पाठवण्यात आले असून सर्च ऑपरेशन सुरू आहे. ही दुर्घटना कशी घडली याबाबत अद्याप माहिती मिळालेली नाही.

दरम्यान, याआधी या वर्षी ५ ऑक्टोबर रोजी
अरुणाचल प्रदेशातील तवांगजवळ भारतीय लष्कराचे हेलिकॉप्टर कोसळले होते. या अपघातात ‘चित्ता’ हेलिकॉप्टरमधील एका पायलटचा मृत्यू देखील झाला होता.

न्यूज अनकट प्रतिनिधी : प्रज्ञा फाटक