बारामती, दि. ३० मे २०२०: बारामती शहरातील गुन्हेगारांना ठेवण्याची जेलची व्यवस्था व जागा ही अस्वच्छ, ढिसाळ व तोकडी आहे. बारामती शहर पोलीस स्टेशनच्या आवारात असणाऱ्या जेल मध्ये सध्या ५० कैदी आहेत. मात्र या जेलची कैद्यांची संख्या २३ आहे. सध्या कोरोना संसर्गाच्या विषाणूचा प्रादुर्भाव टाळण्यासाठी मात्र येथे कोणतीही उपाययोजना दिसत नाहीत. कैद्यांना वैद्यकीय तपासणी साठी हॉस्पिटलमध्ये नेण्यासाठी पुरेसा पोलीस बंदोबस्त मिळत नाही त्यामुळे काही दुष्परिणाम झाला तर या कैद्यांना आपल्या जीवाशी खेळावे लागेल अशी चर्चा आहे.
बारामती शहराची लोकवस्ती वेगाने वाढत आहे. बारामती शहरातील गुन्हेगारांना ठेवण्यासाठी असणाऱ्या जेलची मर्यादा २३ कैद्यांची असताना सध्या जेल मध्ये ५० कैदी आहेत तसेच येथील जेल मध्ये बारामती शहर, बारामती तालुका, वडगाव पोलीस स्टेशन येथील कैदी बारामती मध्ये ठेवले जातात. तसेच मॅजिस्ट्रेट कस्टडी मधील इंदापुर व दौंड येथील कैदी देखील बारामती जेल मध्ये ठेवले जातात. सध्या येरवडा सब जेलचे २१ कैदी त्यांची तारीख असल्याने बारामती येथे आणले आहेत. हे कैदी गेल्या पाच महिन्यांपासून येथेच आहेत. मात्र जेलमधील कैद्यांची संख्या जास्त आहे. येथे गार्ड मध्ये सॅनिटायजर ठेवले आहे. कैद्यांना तोंडाला बांधण्यासाठी मास्क दिले असल्याचे जेलर सब जेल बारामती मयुर खोमणे यांनी सांगितले.
नवीन आरोपीला जेल मध्ये टाकण्याआधी त्याची सरकारी दवाखान्यात वैद्यकीय तपासणी केली जाते तसेच जेल मधील कैद्याना देखील इलाजासाठी सरकारी हॉस्पिटलमध्ये आणले जाते. मात्र परत जेल मध्ये घेऊन गेल्यावर त्यांचे निर्जंतुकीकरण केले जात नाही किंवा बराकी मध्ये प्रमाणापेक्षा जास्त कैदी असल्याने सोशल डिस्टन्स पळाला जात नाही. सध्याच्या कोरोना संसर्गाच्या भीषण परिस्थितीत जर बाहेरून जाणाऱ्या कैद्याची कोरोनाची चाचणी करणे किंवा उपाययोजना करणे गरजेचे आहे.
बारामती पोलीस स्टेशनमध्ये एकूण ५ बराकी आहेत पैकी १ महिलांसाठी राखीव तर ४ बराकीत ५० कैदी ठेवण्यात आले आहेत. येथे जागा कमी असल्याने सोशल डिस्टन्सचे पालन होत नाही केंद्राने जाहीर केलेल्या २७ मार्च पासून लॉकडाऊन जाहीर केल्यावर २० कैद्यांना अंतरिम जामीन मंजूर झाला आहे. असे जेलर खोमणे यांनी सांगितले तर कोरोनाच्या पार्श्वभूमीवर लोकसंख्येच्या हिशोबाने जागा कमी पडते आहे, पोलीस संख्या कमी असल्याने बंदोबस्त कमी पडतो आहे, जेलसाठी होणाऱ्या साफसफाई साहित्य किंवा इतर वस्तूंसाठी शासनाकडून काही आर्थिक तरतूद नाही, दर आठवड्याला कैद्यांची कटिंग, दाढी करण्यासाठी दोन इलेक्ट्रॉनिक मशीन आणल्या आहेत. याचा वापर सर्व कैदी करतात. हे देखील सध्या असणाऱ्या कोरोना संसर्गाच्या दृष्टीने घातक आहे.
बारामती नगर पालिकेने जेल परिसर व आतील स्वच्छता केली पाहिजे मात्र स्वच्छता कर्मचारी येत नाहीत, कैद्यांना डेटॉल, अंघोळीचे साबण स्वच्छता हे मी स्वतःच्या खर्चाने करतो असे खोमणे यांनी सांगितले, मे २०१९ ते जानेवारी २०२० पर्यंत लाईटबिल थकीत आहे, ३०२, ३०७, ३७६ सारख्या गुन्ह्यातले आरोपी अटकेत आहेत, रात्रीच्या वेळी लाईट गेल्यावर इन्व्हर्टरची व्यवस्था नाही अशा अनेक गैरसोय आहेत.
न्यूज अनकट प्रतिनिधी: अमोल यादव
