बांगलादेशात बोटीचा मोठा अपघात, दुर्गापूजेला जाणाऱ्या २४ जणांचा मृत्यू, अनेक बेपत्ता

बांगलादेश, २६ सप्टेंबर २०२२: बांगलादेशातील उत्तरेकडील पंचगड जिल्ह्यातील करतोया नदीत रविवारी दुपारी एक बोट उलटली. ज्यामध्ये २४ जणांचा बुडून मृत्यू झाला. हे वृत्त लिहेपर्यंत अनेक जण बेपत्ता होते. ज्यांच्या शोधात बचाव मोहीम राबविण्यात आली. खरं तर, ही घटना बोडा उपजिल्हाच्या मारिया युनियन कौन्सिलच्या अंतर्गत असलेल्या औलियार घाट परिसरात घडली (बांगलादेशमधील प्रशासकीय क्षेत्र जिल्ह्याचे उप-युनिट म्हणून काम करते). बचाव करण्यात आलेले प्रवासी आणि स्थानिकांनी दिलेल्या माहितीनुसार, बोडा, पंचपीर, मारिया आणि बांगरी भागातील हिंदू समाजाचे लोक महालयाच्या मुहूर्तावर दुर्गा देवीची पूजा करण्यासाठी औलिया घाटातून बडेश्वर मंदिराकडे जात होते.

बोटीत क्षमतेपेक्षा जास्त लोक बसल्याचे सांगण्यात येत आहे. त्यामुळे बोट उलटली. यादरम्यान अनेक प्रवासी पोहत किनाऱ्यावर आले, मात्र अद्यापही बहुतांश प्रवासी बेपत्ता आहेत. माहिती मिळताच पंचगडचे उपायुक्त मोहम्मद जहुरुल इस्लाम घटनास्थळी पोहोचले. उपायुक्तांनी सांगितले की, बोट प्रवाशांनी खचाखच भरल्याने २४ जण बुडाले. आतापर्यंत सापडलेल्या मृतदेहांमध्ये महिला आणि लहान मुलांचा समावेश आहे.

बोडा पोलिस स्टेशनचे प्रभारी अधिकारी सुजॉय कुमार रॉय यांनी सांगितले की, बेपत्ता लोकांच्या सुटकेसाठी शोध मोहीम सुरू आहे. सुटका करण्यात आलेले प्रवासी आणि स्थानिक लोकांनी बेपत्ता झालेल्यांची संख्या ३० पेक्षा जास्त असल्याचे सांगितले. या घटनेच्या तपासासाठी पाच सदस्यीय पथक तयार करण्यात आले आहे. दुसरीकडे बोडा उपजिल्हा आरोग्य आणि कुटुंब नियोजन अधिकारी राजिउर रहमान यांनी सांगितले की, आतापर्यंत सापडलेल्या २४ मृतदेहांपैकी सात मृतदेह बोडा उपजिल्हा आरोग्य संकुलात ठेवण्यात आले आहेत.

एएनआय वृत्तसंस्थेनुसार, नौदल अधिकाऱ्यांनी सांगितले की, बांगलादेशातील हजारो मध्यम आणि लहान आकाराच्या नौकांपैकी ९५% हून अधिक नौका सुरक्षा मानकांचे पालन करत नाहीत. मात्र बांगलादेशातील लाखो लोक राजधानी ढाका किंवा इतर मोठ्या शहरांमध्ये जाण्यासाठी बोटींवर अवलंबून असतात.

या वर्षाच्या सुरुवातीलाही बांगलादेशमध्ये बोटीचा अपघात झाला होता. ज्यामध्ये राजधानी ढाक्याच्या बाहेर एका मालवाहू जहाजावर प्रवासी फेरी आदळल्याने किमान सहा जण ठार झाले आणि अनेक जण बेपत्ता झाले.

न्यूज अनकट प्रतिनिधी: ईश्वर वाघमारे