FIFA कडून मोठा दिलासा, उठवली AIFF वरील बंदी

नवी दिल्ली, २७ ऑगस्ट २०२२: भारतीय फुटबॉलवरील संकट संपले आहे. जागतिक फुटबॉलची प्रशासकीय संस्था फिफाने अखिल भारतीय फुटबॉल महासंघावर (एआयएफएफ) घातलेली बंदी उठवली आहे. यासोबतच भारताकडे पुन्हा १७ वर्षांखालील महिला विश्वचषक २०२२ चे यजमानपद सोपवण्यात आले आहे.

एआयएफएफ कार्यकारी समितीने दैनंदिन कामकाजावर पूर्ण नियंत्रण मिळवल्यानंतर फिफाने हा निर्णय घेतला आहे. FIFA आणि आशियाई फुटबॉल महासंघ (AFC) AIFF मधील परिस्थितीवर लक्ष ठेवत राहतील आणि AIFF ला निवडणुका वेळेत पार पाडण्यासाठी पाठिंबा देतील.

फिफाने हे निवेदन जारी केले

FIFA ने आपल्या निवेदनात म्हटले आहे की, “परिषदेने २५ ऑगस्टपासून AIFF चे निलंबन तात्काळ उठवण्याचा निर्णय घेतला आहे. आता जुन्या योजनेनुसार FIFA U-17 महिला विश्वचषक भारतात ११ ते ३० ऑक्टोबर दरम्यान आयोजित केला जाऊ शकतो. AIFF चे कामकाज चालवण्यासाठी नियुक्त केलेल्या प्रशासकांच्या तीन सदस्यीय समितीची बरखास्ती केल्यानंतर आणि AIFF प्रशासनाने असोसिएशनच्या दैनंदिन कामकाजावर पूर्ण नियंत्रण ठेवल्याची पुष्टी केल्यानंतर हा निर्णय घेण्यात आला आहे.

सर्वोच्च न्यायालयाच्या नव्या निर्णयामुळे बदल

अखिल भारतीय फुटबॉल महासंघाच्या (एआयएफएफ) कामकाजावर नियंत्रण ठेवणारी तीन सदस्यीय समिती (सीओए) बरखास्त करण्याचे आदेश सर्वोच्च न्यायालयाने सोमवारी दिले. त्याच वेळी, न्यायालयाने आदेश दिले होते की एआयएफएफचे दैनंदिन कामकाज कार्यवाहक सरचिटणीस हाताळतील. यासोबतच न्यायालयाने एआयएफएफची कार्यकारी समिती स्थापन करण्याचा निर्णयही घेतला होता.

या कार्यकारी समितीमध्ये २३ सदस्य असतील, ज्यामध्ये सहा खेळाडू (दोन महिला खेळाडू) असतील. इतकेच नव्हे तर, मतदार यादीतील बदल आणि नामनिर्देशन प्रक्रिया सुरू करता यावी यासाठी २८ ऑगस्ट रोजी होणारी निवडणूक आठवडाभरासाठी पुढे ढकलण्याचे आदेशही न्यायालयाने दिले आहेत.

न्यूज अनकट प्रतिनिधी: ईश्वर वाघमारे