‘२४ जूनला अंधेरी-कुर्ला आणि पुण्यात बॉम्बस्फोट होणार’, मुंबई पोलिसांना आला धमकीचा कॉल

मुंबई २३ जून २०२३: मुंबईतील अंधेरी आणि कुर्ला भागात २४ जून रोजी बॉम्बस्फोट होणार आहेत, त्याचबरोबर पुण्यातही स्फोट घडतील. एका व्यक्तीने मुंबई पोलिसांना फोन करून ही धमकी दिली, या धमकीच्या आवाहनाने पोलीस विभागात खळबळ उडाली आहे. घाईघाईत मुंबई पोलिसांनी आपल्या माहिती देणाऱ्यांना सक्रिय केल्यानंतर पोलिसांना धमकी देणारी व्यक्ती ही उत्तर प्रदेशातील असल्याची माहिती मिळाली.

मुंबई पोलिसांनी, यूपी पोलिसांच्या मदतीने आरोपीला जौनपूर येथून अटक केली. दरवेश राजभर असे आरोपीचे नाव असुन त्याला न्यायालयात हजर केल्यानंतर रिमांड घेण्यात येणार असल्याचे पोलीस अधिकाऱ्यांनी सांगितले. दरवेश राजभर याने धमकी का दिली? याबाबत चौकशी करण्यात येत आहे. तरुणाची माहिती मिळताच मुंबई पोलिसांचे पथक कालच विमानाने यूपीला पोहोचले.

मुंबई पोलिसांच्या माहितीनुसार, कॉलरने सकाळी १० वाजता पोलिस कंट्रोलला कॉल केला आणि दावा केला की, २४ जून रोजी संध्याकाळी ६:३० वाजता मुंबईतील अंधेरी, कुर्ला आणि पुणे भागात बॉम्बस्फोट होणार आहेत. एवढेच नाही तर फोन करणाऱ्याने दोन लाख रुपये हवे असल्याचे सांगितले. त्याला ही रक्कम मिळाल्यास तो हा स्फोट रोखू शकतो असे त्याने सांगितले होते.

याप्रकरणी पोलिसांनी भादंवि कलम ५०५(१)(बी), ५०५(२) आणि १८५ अन्वये गुन्हा दाखल केला आहे. मुंबई पोलिस अधिकाऱ्यांनी दिलेल्या माहितीनुसार, पोलिस या तरुणाची कसुन चौकशी केल्यानंतरच संपूर्ण प्रकरण उघड करतील. त्याचवेळी, यूपी पोलिसांच्या अधिकाऱ्यांनी याबाबत कोणतेही अधिकृत वक्तव्य दिलेले नाही.

न्यूज अनकट प्रतिनिधी- सूरज गायकवाड