कर्णधार रोहित शर्माला कोरोनाची लागण, बीसीसीआयची वैद्यकीय टीम घेत आहे काळजी

मुंबई, 26 जून 2022: भारतीय क्रिकेट संघाचा कर्णधार रोहित शर्माला शनिवारी रॅपिड अँटीजेन चाचणीत कोरोनाची लागण झाल्याचे आढळून आले. बीसीसीआयने ट्विटरच्या माध्यमातून ही माहिती दिली आहे. तसेच कर्णधार रोहित शर्मा सध्या सांघिक हॉटेलमध्ये आयसोलेशनमध्ये असून बीसीसीआयच्या वैद्यकीय पथकाच्या देखरेखीखाली असल्याचे सांगितले.

यापूर्वी भारतीय संघाचा दिग्गज फिरकी गोलंदाज रविचंद्रन अश्विनलाही कोरोनाची बाधा झाली होती. यामुळे तो बाकीच्या खेळाडूंसोबत लंडनला गेला नाही. मात्र, आता तो बरा आहे. मीडिया रिपोर्ट्सनुसार, गेल्या आठवड्यात लंडनमध्ये पोहोचलेल्या विराट कोहलीलाही कोरोनाची लागण झाली होती. मात्र, आता तोही बरा आहे.

1 जुलैपासून सुरू होणार टेस्ट

भारत आणि इंग्लंड यांच्यातील एकमेव कसोटी सामना १ जुलैपासून सुरू होणार आहे. गेल्या वर्षी झालेल्या कसोटी मालिकेचा हा भाग आहे. गेल्या वर्षी भारतीय संघ पाच सामन्यांच्या कसोटी मालिकेसाठी इंग्लंडला पोहोचला होता, मात्र चार सामन्यांनंतर भारताचे काही खेळाडू आणि प्रशिक्षकांना कोरोनाची लागण झाल्याचे आढळून आले. अशा स्थितीत टीम इंडियाने चार कसोटीनंतर पाचवी कसोटी खेळण्यास नकार दिला. तीच टेस्ट या दौऱ्यात घेतली जात आहे. पाच कसोटी सामन्यांच्या मालिकेत भारतीय संघ सध्या 2-1 ने आघाडीवर आहे. जागतिक कसोटी चॅम्पियनशिपच्या दृष्टिकोनातूनही ही टेस्ट अत्यंत महत्त्वाची आहे.

न्यूज अनकट प्रतिनिधी: ईश्वर वाघमारे