छत्रपती संभाजी महाराज यांची जयंती साध्या पद्धतीने साजरी

बारामती, दि.१४ मे २०२० : बारामती शहरात दरवर्षी मोठ्या उत्साहात साजरी करण्यात येणारी छत्रपती संभाजी महाराजांची जयंती कोरोना संसर्गामुळे तसेच सर्वत्र लॉकडाऊन असल्याने साध्या पद्धतीने पूजन करून साजरी करण्यात आली.

बारामती शहरात छत्रपती संभाजी महाराज यांची जयंती मोठ्या उत्साहात वाजत गाजत साजरी केली जाते, मात्र सध्या असणाऱ्या कोरोना संसर्गाच्या संकटाने सर्वत्र लॉकडाऊन असल्याने यंदाच्या वर्षी सगळे कार्यक्रम रद्द करण्यात आल्याचे तसेच बारामती तालुक्यातील सर्व शिव भक्तांनी आपल्या घरात राहूनच छत्रपती श्री संभाजी महाराजांचे पूजन करावे असे आवाहन करण्यात आल्याचे श्री छत्रपती जन्मोत्सव समितीच्या वतीने सांगण्यात आले.

शासनाने दिलेल्या जमावबंदीच्या आदेशाचे पालन करत आज (गुरुवार) रोजी कसब्यात शिवाजी उद्यान छत्रपती संभाजी महाराजांच्या प्रतिमेस पुष्पहार अर्पण करुण छत्रपती संभाजी महाराजांच्या प्रतिमेचे पूजन करण्यात आले. यावेळी सोशल डिस्टन्सच्या सर्व नियमांचे पालन करण्यात आले .

न्यूज अनकट प्रतिनिधी: अमोल यादव