पुरंदर, १५ डिसेंबर २०२०: महाराष्ट्राचं कुलदैवत असलेल्या जेजुरी गडावर आज पासून चंपाषष्ठी उत्सवास सुर्वात झाली आहे. सहा दिवस चालणाऱ्या या उत्सवात विविध कार्यक्रम होत असतात. मात्र, यावेळी कोरोनाच्या पार्श्वभूमीवर सर्व कार्यक्रम अत्यंत साधेपणानं साजरे करण्यात येणार आहे. या काळात बाहेर गावच्या भाविकांना गर्दी नं करण्याचं आवाहन देवस्थानच्या वतीनं करण्यात आलं आहे.
महाराष्ट्रचं लोकदैवत असलेल्या श्री. खंडोबाला सर्वसामान्यांपासून ते उच्चभ्रूंपर्यंत मानलं जातं, पूजलं जातं. अश्विन महिन्यात जसा देवीचा नवरात्र उत्सव असतो. तसा हा खंडेरायाचा सहा रात्रींचा उत्सव असतो. गडावर घटस्थापन करुन साजरा होणाऱ्या ‘चंपाषष्ठी’ महोत्सवाला अर्थात खंडेरायाच्या “देवदिवाळी” ला आज उत्साहात सुरवात झाली आहे.
आज सकाळच्या सुमारास मुख्य मंदिरात पाकळणीला सुरुवात करण्यात आली. मार्तंड भैरवनाथासह उत्सव मूर्तींची पूजा अभिषेक करून नवीन पोशाख परिधान करण्यात आला. देवसंस्थानच्यावतीनं मूर्तींना आभूषणं अलंकार परिधान करण्यात आले. चंपाषष्ठीनिमित्त मुख्य मंदिर, गाभारा व घटस्थापना स्थळ आकर्षक फुलांच्या माळांनी सजविण्यात आलं असून गडावर आकर्षक अशी विद्युत रोषणाई करण्यात आली आहे…. गडावर सहा दिवस आणि रात्री “चंपाषष्ठी” हा महोत्सव थाटामाटात साजरा केला जातो.
न्युज अनकट प्रतिनिधी: राहुल शिंदे
