मुख्यमंत्री शिंदे यांचा पंढरपुरात पाहणी दौरा, रस्ते खड्डेमुक्त करण्याचे दिले आदेश

पंढरपूर २६ जून २०२३: आषाढी वारीच्या निमित्ताने मुख्यमंत्री एकनाथ शिंदे यांनी भगवान विठ्ठलाच्या नगरीला, म्हणजेच पंढरपूरला भेट दिली. मुख्यमंत्र्यांनी आपल्या दौऱ्यात जिल्हाधिकाऱ्यांसह वरिष्ठ अधिकाऱ्यांना खडसावल्याचे वृत्त आहे. आषाढी एकादशीसाठी राज्यातून येणाऱ्या लाखो भाविकांसाठी रस्ता, पाणी, स्वच्छता आणि इतर सुविधा उपलब्ध करून देण्यात कोणतीही कमतरता पडू देणार नाही, असे मुख्यमंत्री शिंदे यांनी सांगितले.

आषाढी एकादशीच्या पार्श्वभूमीवर मुख्यमंत्री एकनाथ शिंदे यांनी पंढरपूर शहर आणि परिसरातील तयारीचा आढावा घेतला. मात्र, या कामात काही चुका आढळून आल्या. त्यामुळे मुख्यमंत्री शिंदे यांनी तातडीने जिल्हाधिकाऱ्यांसह सर्व वरिष्ठ अधिकाऱ्यांशी संपर्क साधून बैठक बोलावली. या बैठकीत त्यांना आवश्यक त्या सूचनाही देण्यात आल्या. वारकरी पंढरपुरात दाखल होण्यापूर्वी सर्व कामे लवकर पूर्ण करण्याचे आदेश मुख्यमंत्र्यांनी दिले आहेत.

मुख्यमंत्री एकनाथ शिंदे यांनी तातडीने काम पूर्ण करण्याचे आदेश दिले आहेत. अशा परिस्थितीत लवकरच पंढरपूरकडे जाणारे रस्ते पूर्णपणे चांगले होण्याची शक्यता आहे. त्याचबरोबर विकासकामांसाठी काही रक्कम हवी असल्यास मी तातडीने विशेष निधीची व्यवस्था करतो, असेही शिंदे म्हणाले.

न्यूज अनकट प्रतिनिधी- सूरज गायकवाड