पुणे, 25 सप्टेंबर 2021: शुक्रवारी बिटकॉईनसह सर्व प्रमुख क्रिप्टो चलनांमध्ये मोठी घसरण झाली आहे. याचं कारण चीनच्या मध्यवर्ती बँकेनं दिलेला इशारा आहे. पीपल्स बँक ऑफ चायना, चीनची मध्यवर्ती बँकेनं असं म्हटलं आहे की, सर्व डिजिटल चलन क्रिया बेकायदेशीर आहेत आणि ती त्यांच्यावर कारवाई करेल. वर्चुअल करेंसीसाठी ट्रेडिंग, ऑर्डर मैचिंग, टोकन जारी करणं आणि डेरिव्हेटिव्ह्ज यासारख्या सेवांवर पूर्णपणे बंदी असल्याचं बँकेनं म्हटलंय. एवढंच नाही तर बँकेनं म्हटलं आहे की चीनमध्ये अशा सेवा पुरवणाऱ्या परदेशी क्रिप्टोकरन्सी देखील कायदेशीर मानल्या जाणार नाहीत.
किती झाली घसरण
सीएनबीसीच्या मते, यामुळं, बिटकॉइनची किंमत 4 टक्क्यांहून अधिक घसरली आणि $ 42,378 पर्यंत पोहोचली. त्याचप्रमाणं, जगातील दुसऱ्या क्रमांकाची क्रिप्टोकरन्सी इथरची किंमत 8 टक्क्यांनी आणि एक्सआरपी 7 टक्क्यांनी घसरली.
चीनची सक्तीची कठोर वृत्ती
चीननं यापूर्वी अनेक वेळा क्रिप्टोकरन्सीच्या विरोधात कठोर भूमिका घेतली आहे. यापूर्वी, चीननं क्रिप्टो खाणीवर कठोर कारवाई केली आहे. असे मानले जाते की क्रिप्टो माइनिंग मध्ये बरीच वीज खर्च केली जाते. खरं तर, पीपल्स बँक ऑफ चायनानं म्हटलं आहे की ती क्रिप्टोकरन्सी ट्रेडिंगला प्रोत्साहन देणाऱ्या वित्तीय संस्था, पेमेंट कंपन्या आणि इंटरनेट कंपन्यांवर बंदी आणेल.
चीनच्या मध्यवर्ती बँकेनं असंही म्हटलं आहे की, देशांतर्गत गुंतवणूकदारांना सेवा देणाऱ्या परकीय चलनांवर बंदी घालण्यात येईल. विशेष म्हणजे, बिटकॉइनच्या किमतीत सातत्यानं घसरण झाल्यानंतर, गुरुवारी वाढ झाली, पण पुन्हा एकदा ती घसरणीवर आहे. एप्रिलच्या मध्यात, त्याची किंमत $ 65,000 पार केली होती.
न्यूज अनकट प्रतिनिधी: ईश्वर वाघमारे
