मुंबई, २५ ऑगस्ट २०२३ : महाराष्ट्राचे मुख्यमंत्री एकनाथ शिंदे यांनी गुरुवारी केंद्र सरकारला, कांद्यासाठी खरेदी केंद्रांची संख्या वाढवण्यास सांगितले आहे. कांद्यावर ४० टक्के निर्यात शुल्क लावण्याच्या केंद्राच्या १९ ऑगस्टच्या निर्णयाविरोधात शेतकरी आणि व्यापाऱ्यांनी केलेल्या निषेधाच्या पार्श्वभूमीवर मुख्यमंत्र्यांचे विधान आले आहे.
आपले सरकार कांदा उत्पादक शेतकऱ्यांना मदत करत असल्याचे शिंदे यांनी आवर्जून सांगितले. शिंदे म्हणाले, सध्या नाफेडने स्थापन केलेल्या १३ केंद्रांवर खरेदी सुरू आहे. आतापर्यंत ५०० मेट्रिक टन कांद्याची खरेदी झाली आहे. शेतकऱ्यांकडे उपलब्ध असलेल्या कांद्याचे प्रमाण लक्षात घेऊन खरेदी केंद्रांची संख्या वाढवावी, अशी विनंती केंद्र सरकारला केली आहे.
केंद्राने अलीकडेच दोन लाख मेट्रिक टन कांद्याची २,४१० रुपये प्रति क्विंटल दराने खरेदी करण्याची घोषणा केली होती. मात्र, नाशिक आणि अहमदनगरमध्ये विशेष खरेदी केंद्रे सुरू केली होती. भाव वाढण्याची चिन्हे आणि आगामी सणासुदीचा हंगाम पाहता केंद्र सरकारने देशांतर्गत उपलब्धता वाढवण्यासाठी १९ ऑगस्ट रोजी कांद्याच्या निर्यातीवर ४० टक्के शुल्क लागू केले. या निर्णयामुळे देशांतर्गत बाजारात कांद्याची मुबलक आवक होईल, त्यामुळे भाव पडतील आणि शेतकऱ्यांचे मोठे नुकसान होईल, असा दावा शेतकऱ्यांनी केला आहे.
न्यूज अनकट प्रतिनिधी : सूरज गायकवाड
