लैंगिक छळ प्रकरणी सीएम केजरीवाल यांची कारवाई, निष्काळजीपणा करणारे शिक्षक आणि उपमुख्याध्यापक तत्काळ निलंबित

दिल्ली, २९ ऑगस्ट २०२३: राजधानी दिल्लीतील एका सरकारी शाळेत लैंगिक छळाची घटना उघडकीस आल्यानंतर दिल्ली सरकार अॅक्शन मोडमध्ये आले आहे. दिल्लीचे मुख्यमंत्री अरविंद केजरीवाल यांनी दोन विद्यार्थिनींसोबत लैंगिक गैरवर्तन केल्याप्रकरणी निष्काळजीपणा करणाऱ्या शिक्षक आणि उपमुख्याध्यापकांना तत्काळ निलंबित करण्याचे आदेश जारी केले आहेत.

दिल्ली सरकारने या संपूर्ण प्रकरणाच्या चौकशीसाठी एक पथक स्थापन केले असून ते या घटनेची सखोल चौकशी करत आहेत. या संपूर्ण घटनेचे वर्णन निंदनीय, घृणास्पद आणि दंडनीय असल्याचे सांगून दिल्ली सरकारने दोषींवर कठोर कारवाई करण्याचे सांगितले आहे. दिल्लीतील शाळांचे वातावरण बिघडवणाऱ्यांवर कठोर कायदेशीर कारवाई केली जाईल, असे सरकारने म्हटले आहे.

मुख्यमंत्र्यांच्या सूचनेनुसार, दिल्लीच्या शिक्षण मंत्री आतिशी यांनी सर्व शाळांचे मुख्याध्यापक आणि शिक्षकांना POCSO च्या तरतुदींनुसार कठोर प्रशिक्षण देण्यासाठी शिक्षण संचालनालयाला पत्र लिहिले आहे, जेणेकरून भविष्यात अशा घटना घडू नयेत. या घटनेची दखल घेत दिल्ली महिला आयोगाने दिल्ली पोलीस आणि शिक्षण संचालनालयाला नोटीसही बजावली आहे. दिल्ली महिला आयोगाच्या अध्यक्षा स्वाती मालीवाल यांनी संबंधित शाळेच्या मुख्याध्यापक आणि शिक्षकांच्या भूमिकेवर प्रश्नचिन्ह उपस्थित केले आहे.

न्यूज अनकट प्रतिनिधी : सूरज गायकवाड\