काँग्रेसचे मिशन 2024… सोनियांचे बड्या नेत्यांसोबत विचारमंथन, प्रशांत किशोर यांचे प्रेझेंटेशन

नवी दिल्ली, 17 एप्रिल 2022: दिल्लीत काँग्रेसने शनिवारी अचानक उच्चस्तरीय बैठक बोलावली. 10 जनपथ येथे झालेल्या या बैठकीत पक्षाचे बडे नेते सहभागी झाले होते. यावेळी सद्य राजकीय परिस्थितीसोबतच आगामी लोकसभा निवडणुकीवर चर्चा करण्यात आली. सभेला प्रशांत किशोर यांच्या उपस्थितीने सर्वांचे लक्ष वेधून घेतले. सूत्रांनी दिलेल्या माहितीनुसार, प्रशांत किशोर यांनी 2024 मध्ये होणाऱ्या लोकसभा निवडणुकीच्या रणनीतीवर चर्चा केली.

मिळालेल्या माहितीनुसार, बैठकीत प्रशांत किशोर यांनी 2024 च्या लोकसभा निवडणुकीबाबत काँग्रेस नेत्यांसमोर सविस्तर सादरीकरण केले आहे. यासोबतच 2024 च्या तयारीबाबत रोडमॅपही सांगण्यात आला आहे. या दरम्यान सामूहिक चर्चा तसेच वैयक्तिक चर्चा झाली.

बैठकीपूर्वी काँग्रेसचे ज्येष्ठ नेते मल्लिकार्जुन खरगे यांनी सांगितले की, आज सोनिया गांधी यांनी तातडीची बैठक बोलावली आहे. मी बंगलोरला होतो. याबाबत मला माहिती देण्यात आली. तसेच बैठकीला उपस्थित राहण्यास सांगितले.

प्रशांत यांची रणनीती काय?

काँग्रेस नेते अंबिका सोनी, दिग्विजय सिंग, मल्लिकार्जुन खरगे आणि अजय माकन पक्षाच्या हंगामी अध्यक्षा सोनिया गांधी यांच्या निवासस्थानी झालेल्या बैठकीला उपस्थित होते. यासोबतच काँग्रेस नेते राहुल गांधी आणि केसी वेणुगोपालही या बैठकीत उपस्थित होते. 10 जनपथ येथे काँग्रेसच्या वरिष्ठ नेत्यांची बैठक दुपारी 3 वाजता संपली.

बैठकीत प्रशांत किशोर यांच्याबाबत काँग्रेस पक्षाने आपली भूमिका स्पष्ट केली आहे. यावेळी पक्षाला प्रशांत किशोर यांचा निवडणूक तज्ञ किंवा रणनीतीकार म्हणून पक्षात समावेश करण्याची इच्छा नाही. यावेळी प्रशांत किशोर यांनी पक्षात जावे आणि नंतर कार्यकर्त्याप्रमाणे काम करावे, अशी काँग्रेसची इच्छा आहे.

यावेळी प्रशांत किशोर यांनीही लोकसभा निवडणुकीत काँग्रेस पक्षाने सुमारे 370 जागांवर उमेदवार उभे करावेत, यावर भर दिला आहे. त्यांच्या मते या अशा जागा आहेत जिथे पक्ष मजबूत आहे. उर्वरित जागांवर युतीच्या साथीदारांना उमेदवारी देण्याची संधी द्यावी. या सर्वांशिवाय यावेळी पक्षाने त्या राज्यांवर अधिक लक्ष केंद्रित करावे, जिथे पक्षाची स्थिती आधीच मजबूत आहे, असा सल्लाही प्रशांत यांनी दिला आहे.

सोनियांनी एका इंग्रजी वृत्तपत्रात लिहिला लेख

दुसरीकडे, काँग्रेस अध्यक्षा सोनिया गांधी यांनी शनिवारी एका वृत्तपत्रात लिहिलेल्या लेखात सरकारवर निशाणा साधला होता. सोनिया गांधी म्हणाल्या की, आज आपल्या देशात द्वेष, कट्टरता आणि असहिष्णुतेचे वातावरण आहे. आता हे थांबवले नाही तर ते नियंत्रणाबाहेर जाईल.

याआधीच्या बैठकीत काय झाले

पक्षाने काँग्रेस कार्यकारिणीची बैठक बोलावली होती. यामध्ये काँग्रेसच्या दिग्गजांनी 5 तास बैठकीत विचारमंथन केले. आमचा उद्देश काय आहे आणि आम्ही लोकांपर्यंत काय पोहोचवणार आहोत हे स्पष्ट व्हायला हवे, वेगवेगळ्या राज्यांसाठी वेगवेगळी रणनीती बनवायची आहे, असे राहुल गांधी यांनी बैठकीत सांगितले होते.

न्यूज अनकट प्रतिनिधी: ईश्वर वाघमारे