राज्यात कोरोनाचा हाहाकार, एकाच दिवसात विक्रमी ६८,६३१ नवीन रुग्णांची नोंद

मुंबई, १९ एप्रिल २०२१: महाराष्ट्रात कोरोना संसर्गाने भयावह रूप धारण केले आहे. राज्यात दररोज नवीन विक्रमी आकडा समोर येत आहे. राज्यात गेल्या २४ तासांत विक्रमी ६८,६३१ नवीन रुग्णांची नोंद झाली तर ५०३ लोकांचा मृत्यू झाला. २४ तासांत ४५,६५४ रूग्णांना सुट्टीही देण्यात आली. अशा प्रकारे आतापर्यंत एकूण ३१,०६,८२८ लोकांना घरी सोडण्यात आले आहे.

कोरोना मुंबईतही आपला कहर दाखवत आहे. मुंबईत गेल्या २४ तासांत कोरोनाचे ८४७९ नवीन प्रकरणे समोर आली. त्याच बरोबर ५३ लोकांचा मृत्यू देखील झाला आहे. मुंबईत सध्या कोरोनाची ८७,६९८ सक्रिय प्रकरणे आहेत. कोरोनामुळे आतापर्यंत येथे ११८८ इमारती सील करण्यात आल्या आहेत.

अत्यावश्यक सेवांसाठी कलर कोड जारी

१ मे रोजी सकाळी ७ वाजेपर्यंत महाराष्ट्रात कोरोना कर्फ्यू लागू आहे. या वेळी केवळ आवश्यक सेवांशी निगडीत लोकांना बाहेर पडण्याची परवानगी आहे. अशा परिस्थितीत नाकाबंदीच्या वेळी अत्यावश्यक सेवा आणि रुग्णवाहिकांमध्ये व्यस्त असलेले लोक रहदारीच्या अडचणीत अडकतात. हे टाळण्यासाठी मुंबई पोलिसांनी पुढाकार घेतला आहे. अत्यावश्यक सेवेत असलेल्या लोकांसाठी पोलिसांनी कलर कोड जारी केले आहेत.

मुंबई पोलिस आयुक्त हेमंत नागराळे म्हणाले की, तीन कलर कोड जारी केले गेले आहेत, जे आवश्यक सेवांशी संबंधित लोकांना त्यांच्या वाहनांवर लावावे लागतील. आरोग्य कर्मचारी, वैद्यकीय आणि रुग्णालयांशी संबंधित लोकांना लाल रंग वापरावा लागेल. त्याचबरोबर भाज्या, फळे, दूध यासारख्या सेवांमध्ये गुंतलेल्यांसाठी हिरवा रंग असेल. तर सरकारी कर्मचाऱ्यांसाठी पिवळा रंग जाहीर करण्यात आला आहे.

न्यूज अनकट प्रतिनिधी: ईश्वर वाघमारे