कोविड काळातील बॉडी-बॅग खरेदी घोटाळा, मुंबईच्या माजी महापौर किशोरी पेडणेकर EOW समोर हजर

मुंबई, ११ सप्टेंबर २०२३: कोविड काळातील प्राण गमावलेल्या लोकांचे मृतदेह ठेवण्यासाठीच्या ‘बॉडी बॅग’ खरेदीत झालेल्या, कथित घोटाळ्याशी संबंधित प्रकरणासंदर्भात, मुंबईच्या माजी महापौर किशोरी पेडणेकर सोमवारी मुंबई पोलिसांच्या आर्थिक गुन्हे शाखेसमोर हजर झाल्या. मुंबई उच्च न्यायालयाने ६ सप्टेंबर रोजी पेडणेकर यांना अटकेपासून चार आठवड्यांचे अंतरिम संरक्षण दिले होते, कारण या प्रकरणाचा तपास सुरू आहे.

पेडणेकर यांना या प्रकरणाच्या तपासात सहकार्य करण्याचे आणि ११, १३ आणि १६ सप्टेंबर रोजी शहर पोलिसांच्या आर्थिक गुन्हे शाखेसमोर चौकशीसाठी हजर राहण्याचे निर्देश न्यायालयाने दिले होते. पोलिस अधिकाऱ्याने सांगितले की, पेडणेकर सोमवारी सकाळी ११ वाजता येथील ईओडब्ल्यू कार्यालयात या प्रकरणी चौकशीसाठी पोहोचल्या. सत्र न्यायालयाने पेडणेकर यांचा अटकपूर्व जामीन अर्ज फेटाळल्यानंतर त्यांनी उच्च न्यायालयात धाव घेतली होती. सेशन्स कोर्टाने म्हटले होते की, पेडणेकर यांच्यावर आर्थिक गुन्ह्यांमध्ये सार्वजनिक पैशांचा समावेश असलेल्या मोठ्या रकमेचा समावेश आहे.

मुंबई पोलिसांच्या आर्थिक गुन्हे शाखेने ( EOW ) भारतीय जनता पक्षाचे (भाजप) नेते किरीट सोमय्या यांच्या तक्रारीच्या आधारे पेडणेकर आणि बृहन्मुंबई महानगरपालिकेच्या (BMC) दोन वरिष्ठ अधिकाऱ्यांविरुद्ध कलम ४२० ( फसवणूक) आणि १२० (बी) (गुन्हेगारी कट) नोंदवली आहे. भारतीय दंड संहितेच्या विविध कलमांखाली गुन्हा दाखल करण्यात आला. महामारीच्या काळात आरोग्य सुविधांच्या व्यवस्थापनात आणि कोरोनामुळे जीव गमावलेल्या रुग्णांचे मृतदेह ठेवण्यासाठी बॉडी बॅग, मास्क आणि इतर वस्तूंच्या खरेदीत पालिकेने निधीचा गैरवापर आणि गैरव्यवहार केल्याचा त्यांच्यावर आरोप आहे.

न्यूज अनकट प्रतिनिधी : सूरज गायकवाड