कुत्र्याला वाचवण्याच्या प्रयत्नात ट्रॅक्टरखाली चिरडून मृत्यू

माढा, २७ ऑक्टोबर २०२०: कुत्र्याला वाचविण्याच्या प्रयत्नात माढा शहरात एका व्यक्तीचा मृत्यू झाला आहे. त्यामुळे शहरात दिवसभर हळहळ व्यक्त केली जात आहे.

मृत व्यक्ती संग्राम निवास कदम वय १७ हा स्वतः ट्रॅक्टर चालवत होता. ट्रॅक्टर चालवत असताना अचानक कुत्रा आडवा गेल्याने त्याला वाचविण्याच्या प्रयत्नात चालकाचे ट्रॅक्टरवरचे नियंत्रण सुटल्याने ट्रॅक्टर रस्त्याच्या कडेला झुडपात जाऊन पलटी झाला व संग्राम कदम ट्रॅक्टरखाली चिरडला गेला. घटनास्थळी उपस्थित असणाऱ्या नागरिकांनी जेसीबीच्या साह्याने ट्रॅक्टर खालून संग्राम कदम यास ग्रामीण रुग्णालयात दाखल केले मात्र डॉक्टरांनी त्याला मृत घोषित केले.

पोलिसात या घटनेची आकस्मित मृत्यू म्हणून नोंद करण्यात आली असून मृताचे शवविच्छेदन करण्यात आले आहे. याचा पोलीस तपास विजय राजगुरू करीत आहेत.

न्यूज अनकट प्रतिनिधी: प्रदीप पाटील