सपा आमदार अबू आझमी यांना पुन्हा जीवे मारण्याची धमकी, एफआयआर दाखल

मुंबई २७ जून २०२३: महाराष्ट्रातून येणाऱ्या मोठ्या वृत्तानुसार, मुंबईत सपा आमदार अबू आझमी यांना जीवे मारण्याच्या धमक्या आल्या आहेत. त्यांनी याबाबत मुंबईच्या कुलाबा पोलिसांना माहिती दिली. तीन दिवसांपासून सतत फोन आणि व्हॉट्सअपवर जीवे मारण्याच्या धमक्या दिल्या जात आहेत. या प्रकरणाची माहिती देताना मुंबई पोलिसांनी सांगितले की, समाजवादी पक्षाचे महाराष्ट्र अध्यक्ष आणि आमदार अबू आझमी यांनी व्हॉट्सअपवर जीवे मारण्याच्या धमक्या मिळाल्याची तक्रार केल्यानंतर, मुंबईच्या कुलाबा पोलिसांनी अज्ञात व्यक्तीविरुद्ध एफआयआर नोंदवला.

अबू आझमी यांनी महाराष्ट्राचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, मुंबईचे पोलीस आयुक्त विवेक फणसळकर आणि मुंबई पोलिसांनी या प्रकरणाची दखल घेऊन तातडीने कारवाई करावी, असे आवाहन केले आहे.

जानेवारी महिन्यातही समाजवादी पक्षाचे महाराष्ट्र प्रमुख अबू असीम आझमी यांना औरंगजेबच्या समर्थनार्थ केलेल्या वक्तव्यामुळे जीवे मारण्याच्या धमक्या आल्या होत्या. त्यानंतर या प्रकरणीही त्यांनी मुंबईतील कुलाबा पोलीस ठाण्यात एफआयआर दाखल केला होता. त्यावेळीही भारतीय दंड संहितेच्या संबंधित कलमांतर्गत अज्ञात व्यक्तीविरुद्ध गुन्हा दाखल करण्यात आला होता.

न्यूज अनकट प्रतिनिधी- सूरज गायकवाड