पुणे ११ फेब्रुवारी २०२५ : जिल्ह्यातील चाकण-मोशी हा अत्यंत महत्त्वाचा आणि वाहतुकीसाठी गजबजलेला मार्ग सध्या अत्यंत दयनीय अवस्थेत आहे. खड्डेमय, धुळीने भरलेला आणि ठिकठिकाणी उखडलेला हा रस्ता नागरिकांच्या त्रासाला निमंत्रण देत आहे. या रस्त्याच्या दुरवस्थेमुळे स्थानिक रहिवासी, वाहनचालक आणि प्रवासी अक्षरशः हैराण झाले आहेत.
दररोज हजारो छोटे-मोठे वाहनधारक या मार्गावरून प्रवास करतात. परंतु, खराब रस्त्यामुळे अपघात होण्याची शक्यता वाढली आहे. विशेषतः दुचाकीस्वारांसाठी हा रस्ता जीवघेणा ठरत आहे. मोठमोठे खड्डे टाळण्यासाठी वाहनचालक अचानक गाडीच्या दिशा बदलतात, त्यामुळे अनेकदा अपघात होण्याच्या घटना घडतात. काही ठिकाणी रस्त्यावरील खड्डे एवढे खोल झाले आहेत की पावसाळ्यात ते पाण्याने भरून वाहतुकीसाठी धोकादायक ठरतात.
स्थानिक नागरिक आणि व्यावसायिकांनी वारंवार प्रशासनाकडे तक्रार केली असली तरी अद्याप कोणतीही ठोस कारवाई झालेली नाही. काही महिने आधी या रस्त्याचे काम हाती घेण्यात आले होते, मात्र ते अपूर्ण अवस्थेतच सोडण्यात आले. परिणामी, परिस्थिती अधिकच बिकट झाली आहे.
“दररोज आम्हाला या खराब रस्त्याचा त्रास सहन करावा लागतो. वाहतूक कोंडी तर ठरलेलीच आहे, पण आरोग्यावरही याचा वाईट परिणाम होत आहे. प्रशासनाने तातडीने काहीतरी उपाययोजना करावी,” अशी मागणी स्थानिक रहिवासी सोनाली तांबे यांनी केली.
या परिस्थितीवर लवकरात लवकर उपाय न केल्यास नागरिकांनी तीव्र आंदोलन छेडण्याचा इशारा दिला आहे. प्रशासनाने त्वरित लक्ष घालून रस्ता दुरुस्त करावा, अन्यथा नागरिकांच्या संतापाचा उद्रेक होण्याची शक्यता नाकारता येत नाही.
न्यूज अनकट प्रतिनिधी: सोनाली तांबे
