पुणे, ११ जुलै २०२३ : DRDO चे वैज्ञानिक डॉ. प्रदीप कुरुलकर यांनी पाकिस्तानी गुप्तचर यंत्रणांना भारताची संवेदनशील माहिती पुरवल्याच्या आरोपांखाली अटक करण्यात आली आहे, त्यातच आत्ता या प्रकरणी एटीएस ने न्यायालयात दाखल केलेल्या आरोपपत्रात धक्कादायक माहिती उघड झाली आहे.
राज्य दहशतवाद विरोधी पथकाने कुरुलकर यांच्याविरुद्ध विशेष न्यायाधीश व्ही. आर. कचरे यांच्या न्यायालयात एक हजार ८३७ पानांचे आरोपपत्र नुकतेच दाखल केले. कुरुलकर यांनी पाकिस्तानी गुप्तचर यंत्रणेतील हेर झारा दासगुप्ता हिच्याशी, सोशल मीडिया माध्यमावरून केलेल्या चर्चाची प्रत राज्य दहशतवाद विरोधी पथकाने न्यायालयात दाखल केलेल्या आरोपपत्रात जोडली आहे. या संवादातून कुरुलकर यांनी झाराबरोबर अग्नि, ब्रह्मोस, रुस्तम या क्षेपणास्त्रांविषयी चर्चा केल्याचं उघड झालं आहे.
तसेच कुरुलकर यांनी दोन महिलांना डीआरडीओतील कामे मिळवून देण्याच्या आमिषाने अत्याचार केल्याचे आरोपपत्रात नमूद केलं आहे. कुरुलकर यांना अटक करण्यात आल्यानंतर तपासात अनेक बाबी समोर आल्या आहेत. एटीएसच्या पथकाने दोन महिलांची या संदर्भात चौकशी केली होती. कुरुलकर यांनी दोन महिलांना डीआरडीओच्या विश्रामकक्षात बोलावले होते, असे महिलांचे जबाब एटीएसच्या पथकाने नोंदवून घेतले आहे. एटीएसने न्यायालयात दाखल केलेल्या आरोपपत्रात कुरुलकर यांनी दोन महिलांचे शोषण केल्याचा आरोप ठेवला आहे.
Drdo प्रकरण काय ?
भारतीय संरक्षण संशोधन आणि विकास संस्था (Defence Research and Development Organisation) च्या शास्त्रज्ञाला हनी ट्रॅपमध्ये फसवून त्यांच्याकडून भारतीय संरक्षण क्षेत्रातील संवेदनशील माहिती मिळवण्याचा प्रयत्न होता. पाकिस्तानी गुप्तचर यंत्रणांना भारताची संवेदनशील माहिती पुरवल्याच्या आरोपांखाली अटकेत असलेले डीआरडीओचे शास्त्रज्ञ डॉ. प्रदीप कुरुलकर यांनी ब्रह्मोस-अग्नी आणि युसीव्ही सारख्या क्षेपणास्त्रांची माहिती पाकिस्तानला पुरवली असल्याचं एटीएस च्या आरोपपत्रात समोर आलं आहे.
एटीएसने ३० जून रोजी डॉ. कुरुलकर यांच्या विरोधात आरोपपत्र दाखल केल होत. (ATS) महाराष्ट्र दहशतवाद विरोधी पथकाने विशेष न्यायालयात कुरुलकर यांच्या विरोधात दाखल केलेल्या आरोपपत्रात अनेक गोष्टी समोर आल्या आहेत. आरोप पत्रात सांगितल्याप्रमाणे, डॉ. प्रदीप कुरुलकर यांनी पहिले तर पाकिस्तानी महिला गुप्तचराला भारतीय क्षेपणास्त्र, ड्रोन आणि रोबोटिक्स संदर्भातील माहिती पुरवल्याचं समोर आलं आहे.
त्यानंतर पाकिस्तानी एजंटने, डॉ. कुरुलकर यांच्यासोबत सोशल मीडियावर संवाद साधण्यासाठी वेगवेगळ्या नावांनी बनावट सोशल मीडिया अकाउंट तयार केली. यापैकी दोन अकाउंट झारा दासगुप्ता आणि जुही अरोरा या नावाने होती. प्रदीप कुरुलकर यांच्यासोबत झारा दासगुप्ता नावाच्या आयडीवरून चॅट करणाऱ्या पाकिस्तान एंजेटने ब्रिटनमध्ये सॉफ्टवेअर इंजिनियर असल्याचं सांगितलं होतं. झाराने प्रदीप कुरुलकर यांच्यासोबत मैत्री केली. यानंतर या पाकिस्तानी एजंटने कुरुलकर यांच्याकडून ब्रह्मोस क्षेपणास्त्र, अग्नी क्षेपणास्त्र आणि मिलिटरी बिडिंग सिस्टम, ड्रोन, यूसीव्ही आणि इतर महत्वाच्या वस्तूची माहिती मागितली. त्यानंतर कुरुलकर यांनी ही सर्व माहिती जमा करून त्या पाकिस्तानी एजंटला पाठवली.
प्रदीप कुरुलकर झारासमोर आपल्या कामाची हुशारी मारत असे, असेही आरोपपत्रात नोंदवलं आहे. एटीएसने दाखल केलेल्या १८३७ पानांच्या आरोपपत्रात मोठ्या बाबी समोर आल्या आहेत. यातील एका चॅटमध्ये, पाकिस्तानी एजंटांनी अग्नी-6 लाँचर चाचणी यशस्वी झाली का, असं विचारल्या वर कुरुलकर यांनी या प्रश्नावर उत्तर दिलं की, “लाँचर हे माझं डिझाइन आहे. हे एक मोठं यश आहे. कुरुलकर आणि पाकिस्तानी एजंट्समधील हा चॅट सप्टेंबर २०२२ ते फेब्रुवारी २०२४ दरम्यानचा आहे.
डीआरडीओ ही सरकारी संस्था देशाच्या लष्करासाठी लागणाऱ्या अत्याधुनिक तंत्रज्ञानाच्या हत्यारांची निर्मिती करते. या संस्थेच्या वैज्ञानिकाने पाकिस्तानला संवेदनशील माहिती पुरवल्याने एकच खळबळ उडाली आहे.
न्यूज अनकट प्रतिनिधी : वैभव शिरकुंडे
