खालापूर, रायगड १० डिसेंबर २०२३ : मुंबई पुणे एक्सप्रेस वेवर आज पहाटेच्या सुमारास एका खाजगी बसने कंटेनरला जोरदार धडक दिल्याने भीषण अपघात झाला. या अपघातात बस चालकाचा जागीच मृत्यू झाला असुन १० प्रवासी जखमी झाले आहेत. वैभव ट्रॅव्हलची बस प्रवासी घेऊन मुंबई ते कोल्हापूर अशी जात असताना, एक्सप्रेस वेवरील बोरघाटात,आडोशी बोगद्याजवळ चालकाचे बस वरील नियंत्रण सुटल्याने बसने समोरील कंटेनरला जोरदार धडक दिली.
या अपघाताची माहिती मिळताच खोपोली पोलीस, बोरघाट पोलीस तसेच आयआरबी पेट्रोलिंग, देवदूत यंत्रणा, डेल्टा फोर्सचे जवान, महाराष्ट्र सुरक्षा बलचे जवान, अपघातग्रस्त टीमचे सदस्य तात्काळ घटनास्थळी दाखल झाले. त्यांनी बस मध्ये अडकलेल्या प्रवाशांना बाहेर काढून तात्काळ लोकमान्य टिळक हॉस्पिटल पुणे आणि काहींना एमजीएम हॉस्पिटल कळंबोली येथे उपचारासाठी पाठवले. या अपघातात बस आणि कंटेनरचे मोठ्या प्रमाणात नुकसान झाले असून बस क्रेनच्या साहाय्याने बाजूला घेऊन वाहतुकीसाठी रस्ता सुरळीत करण्यात आला.
न्यूज अनकट प्रतिनिधी : दत्तात्रय शेडगे
