कोलकाता, २० ऑक्टोबर २०२२ : ई-नगेट्स गेमिंग ॲप प्रकरणात, ईडी कोलकाताने उल्टाडांगा परिसरातील व्यावसायिक उमेश अग्रवाल यांच्या कार्यालयावर आणि घरावर छापे टाकले आहेत. यादरम्यान ईडीच्या पथकाने मोठी रोकड जप्त केली. संघाचा शोध अजूनही सुरू आहे. तेथे किती रोकड सापडली हे अद्याप कळू शकलेले नाही. यापूर्वी, ईडीने गार्डन रीच भागातील आमिर खानच्या घरातून १७.३२ कोटी रुपये रोख जप्त केले होते. त्यानंतर आता आरोपीच्या जवळच्या उमेश अग्रवालच्या घरावर छापा टाकण्यात आला आहे. ईडीची टीम ई नगेट्स गेमिंग ॲपच्या बाबतीत सतत कारवाई करत आहे.
ई-नगेट्स ॲपचा मालक आमिर खानच्या क्रिप्टोकरन्सीद्वारे ईडीने सुमारे १७ कोटी रुपये जप्त केले होते. वास्तविक ई नगेट्स हे एक ऑनलाइन गेमिंग ॲप आहे ज्याद्वारे कोट्यवधी रुपयांची फसवणूक झाली. याप्रकरणी कारवाई करत ईडीने आरोपी आमिर खानला उत्तर प्रदेशातील गाझियाबाद येथून अटक केली.
तेलंगणा आणि आंध्र प्रदेशात २० ठिकाणी ईडी चे छापे..
सूत्रांनी दिलेल्या माहितीनुसार, मंगळवारी अंमलबजावणी संचालनालयाने तेलंगणा आणि आंध्र प्रदेशमधील एमबीएस ग्रुप ऑफ कंपनीज आणि मुसादिलाल ज्वेलर्सच्या अनेक ठिकाणी छापे टाकले होते. माहितीनुसार, अंमलबजावणी एजन्सीने हैदराबादसह तेलंगणा आणि आंध्र प्रदेशमध्ये २० ठिकाणी छापे टाकले आहेत. मनी लाँडरिंग आणि फॉरेन एक्स्चेंज मॅनेजमेंट अॅक्टच्या संदर्भात हे छापे टाकण्यात आले. अधिकाऱ्याने सांगितले की, एमबीएस ग्रुप आणि त्याचे संचालक सुकेश गुप्ता आणि सहयोगी कंपन्यांना अतिरिक्त पाच टक्के कर न भरता परकीय चलन स्थिती राखण्यासाठी एमएमटीसीकडून क्रेडिटवर सोने मिळाले होते. त्यामुळे महामंडळाचे नुकसान झाले.
न्यूज अनकट प्रतिनिधी – सुरज गायकवाड
