दिल्ली जाम करण्याची शेतकऱ्यांची चेतावणी, रात्री उशिरा झाली उच्चस्तरीय बैठक

नवी दिल्ली, ३० नोव्हेंबर २०२०: शेती कायद्याबाबत गेल्या २ महिन्यांपासून शेतकरी आंदोलन करत आहेत आणि आता हा लढा दिल्लीच्या जवळ आला आहे. हे शेतकरी गेल्या ४ दिवसांपासून दिल्ली सीमेवर उभे आहेत आणि जंतर-मंतरवर आंदोलन करण्याची त्यांची मागणी आहे. रविवार हा शेतकरी चळवळीमुळे व्यस्त दिवस होता. निदर्शनासाठी बुराडीला जाण्यास शेतकऱ्यांनी नकार दिला, त्यानंतर रात्री उशीरा भाजप अध्यक्ष जेपी नड्डा यांच्या घरी उच्चस्तरीय बैठक झाली.

कृषी कायदे रद्द करण्यासाठी शेतकरी आंदोलन करीत आहेत. शेतकरी आंदोलन पाहता, भाजपा अध्यक्ष जेपी नड्डा यांच्या निवासस्थानी एक उच्चस्तरीय बैठकही बोलविण्यात आली होती, ज्यात गृहमंत्री अमित शाह यांच्यासह संरक्षणमंत्री राजनाथ सिंह आणि कृषिमंत्री नरेंद्र सिंह तोमर हेदेखील सहभागी झाले होते. ही बैठक सुमारे २ तास चालली.

दिल्लीमध्ये प्रदर्शन करण्याची परवानगी मिळावी: आप

दरम्यान, आम आदमी पार्टी (आप) नेते राघव चढा यांनी दिल्लीत शेतकऱ्यांना निषेध करण्याची परवानगी द्यावी अशी मागणी केली आणि म्हणाले की, ज्या ठिकाणी शेतकऱ्यांना निषेध करायचा आहे तिथे परवानगी देण्यात यावी. दिल्लीचे मुख्यमंत्री अरविंद केजरीवाल यांनीही ट्विट केले की केंद्र सरकारने शेतकऱ्यांशी तातडीने बिनशर्त चर्चा करावी.

तर राजस्थानचे मुख्यमंत्री अशोक गहलोत यांनी पंतप्रधान नरेंद्र मोदी यांना पत्र लिहिले आहे. त्यांनी आपल्या पत्राद्वारे पंतप्रधान मोदींना शेतकर्‍यांचे म्हणणे ऐकून कृषी कायद्यांचा फेरविचार करण्याची विनंती केली आहे.

न्यूज अनकट प्रतिनिधी: ईश्वर वाघमारे