अमेरिकेत पुन्हा गोळीबार, स्वातंत्र्य दिनाच्या परेडमध्ये फायरींग, 6 ठार, 24 जखमी

यूएस, 5 जुलै 2022: शिकागोच्या इलिनॉयच्या हायलँड पार्कमध्ये सोमवारी स्वातंत्र्य दिनानिमित्त एक परेड आयोजित करण्यात आली होती, मात्र अचानक गोळीबार झाला. या घटनेमुळे एकच गोंधळ उडाला. रॉयटर्सच्या रिपोर्टनुसार, इलिनॉयच्या गव्हर्नरने दावा केला आहे की या गोळीबारात 6 लोकांचा मृत्यू झाला आहे, तर 24 लोक जखमी झाले आहेत. सर्वांवर रुग्णालयात उपचार सुरू आहेत. उंच इमारतीवरून हा गोळीबार करण्यात आल्याचे सांगण्यात येत आहे. अमेरिका यावेळी 246 वा स्वातंत्र्यदिन साजरा करत असल्याची माहिती आहे.

एक बंदूक जप्त, संशयित 20 वर्षांचा असू शकतो

फरार हल्लेखोराच्या शोधात गुंतलेल्या पोलिसांनी त्याचे वय 18 ते 20 वर्षांच्या दरम्यान असल्याचे सांगितले. त्याचा रंग गोरा, लांब काळे केस आहेत. त्याने पांढरा किंवा निळा टी-शर्ट घातला आहे. घटनास्थळावरून एक बंदूकही सापडल्याचे पोलिसांनी सांगितले. हल्लेखोर काळ्या रंगाच्या एसयूव्हीमध्ये असण्याची शक्यता पोलिसांनी व्यक्त केली आहे. मात्र, हल्लेखोराला पकडण्यासाठी पोलिसांनी संपूर्ण परिसराला वेढा घातला आहे. त्याचबरोबर हल्ल्यानंतर लोकांना घरातच राहण्याचे आवाहन करण्यात आले आहे. पोलिसांनी सांगितले की, हल्लेखोराच्या मृत्यूची अफवा सोशल मीडियावर व्हायरल होत आहे. तो अद्याप पकडला गेला नाही.

या घटनेची माहिती ट्विटरवर देत प्रशासनाने लोकांना घटनास्थळापासून दूर राहण्याचे आवाहन केले आहे. डब्ल्यूजीएन टीव्हीने सूत्रांच्या हवाल्याने सांगितले की, गोळीबारात अनेक लोक गंभीर जखमी झाले आहेत.

अमेरिकेच्या प्रतिनिधीने मृत्यूबद्दल शोक व्यक्त केला

यूएस प्रतिनिधी ब्रॅड श्नाइडर यांनी रॉयटर्सला सांगितले की हायलँड पार्कमध्ये गोळीबार सुरू झाला तेव्हा ते आणि त्यांचे जिल्ह्याचा प्रचार पथक परेडमध्ये सर्वात पुढे होता. श्नाइडर यांनी ट्विटरवर म्हटले आहे की, “अनेकांचा जीव गेला आहे आणि बरेच जण जखमी झाले आहेत. हल्ल्यातील सर्व बळी आणि त्यांच्या कुटुंबियांप्रती माझी संवेदना आहे.

परेड सुरू झाल्यानंतर 10 मिनिटांनी गोळीबार

शिकागो सन-टाइम्सच्या रिपोर्टनुसार, परेड सुरू झाल्यानंतर सुमारे 10 मिनिटांनी गोळीबार करण्यात आला. यानंतर परेड थांबवण्यात आली. जीव वाचवण्यासाठी शेकडो लोक इकडे तिकडे धावू लागले. शिकागोच्या CBS 2 टेलिव्हिजनने परेडमध्ये उपस्थित असलेल्या एका निर्मात्याचा हवाला देत म्हटले आहे की अनेक मोठा स्फोट ऐकून लोक घटनास्थळावरून पळून गेले.

न्यूज अनकट प्रतिनिधी: ईश्वर वाघमारे