‘इलेक्ट्रिक हायवे’वर प्रवास करण्यासाठी व्हा सज्ज, नितीन गडकरींनी सांगितली सरकारची योजना

नवी दिल्ली, १३ सप्टेंबर २०२२: देशात सौरऊर्जेवर चार्ज होणारे विद्युत महामार्ग तयार करण्याची तयारी सुरू आहे. केंद्रीय रस्ते वाहतूक आणि महामार्ग मंत्री नितीन गडकरी यांनी सोमवारी एका कार्यक्रमादरम्यान सरकारच्या योजनेची माहिती दिली. देशाची सार्वजनिक वाहतूक व्यवस्था इलेक्ट्रिक करण्यावर सरकार भर देत असल्याचा पुनरुच्चार त्यांनी केला.

आयएसीसीच्या कार्यक्रमात दिली माहिती

पीटीआयनुसार, केंद्रीय मंत्री नितीन गडकरी यांनी इंडो-अमेरिकन चेंबर ऑफ कॉमर्स (IACC) या उद्योग संस्थेच्या कार्यक्रमात संबोधित करताना ही माहिती दिली. ते म्हणाले की, सरकार सौरऊर्जेवर चालणाऱ्या विद्युत महामार्गांच्या विकासावर काम करत आहे.

या हालचालीमुळे उच्च मालवाहतूक क्षमता असलेल्या ट्रक आणि बसेसचे चार्जिंग सुलभ होईल. इलेक्ट्रिक हायवे हा एक रस्ता आहे जो त्यावरून चालणाऱ्या वाहनांना वीज पुरवठा करण्यास सक्षम आहे. यात ओव्हरहेड पॉवर लाइनमधून उर्जेचा पुरवठा देखील समाविष्ट आहे.

देशात बांधले जात आहेत २६ नवीन एक्सप्रेसवे

आपल्या भाषणादरम्यान, केंद्रीय मंत्री पुढे म्हणाले की, इलेक्ट्रिक वाहनांसाठी सौर आणि पवन ऊर्जा आधारित चार्जिंग प्रणालीच्या विकासाला प्रोत्साहन देण्यासाठी हे पाऊल उचलले जात आहे. ते म्हणाले की चांगल्या विकसित पायाभूत सुविधांमुळे आर्थिक क्रियाकलाप वाढण्यास मदत होते. यातून नवनवीन कंपन्या निर्माण होऊन त्यांच्या माध्यमातून रोजगाराच्या संधी वाढतात. देशात २६ नवीन एक्स्प्रेस वे बांधले जात आहेत, असेही गडकरी म्हणाले.

टोल प्लाझा सौरऊर्जेवर चालणार

गडकरी म्हणाले की, रस्ते मंत्रालय टोल प्लाझा सौरऊर्जेवर चालवण्यासही प्रोत्साहन देत आहे. अलीकडेच, संसदेच्या पावसाळी अधिवेशनादरम्यान राज्यसभेत एका लेखी उत्तरात नितीन गडकरी म्हणाले की, १९ मार्च २०२२ पर्यंत देशात एकूण १०,६०,७०७ इलेक्ट्रिक वाहनांची नोंदणी झाली आहे. तर, ब्युरो ऑफ एनर्जी इफिशियन्सी (बीईई) च्या डेटानुसार, २१ मार्च २०२२ पर्यंत देशात १,७४२ सार्वजनिक इलेक्ट्रिक वाहन चार्जिंग स्टेशन कार्यरत झाले आहेत.

गुंतवणूकदारांना आमंत्रण

केंद्रीय परिवहन मंत्री पुढे म्हणाले की पीएम गति शक्ती मास्टर प्लान लाँच केल्याने प्रकल्पांना जलद मंजुरी मिळेल आणि यामुळे लॉजिस्टिक खर्च कमी होईल. त्यांनी अमेरिकेतील खाजगी गुंतवणूकदारांना भारतातील लॉजिस्टिक, रोपवे आणि केबल कार क्षेत्रात गुंतवणूक करण्यासाठी आमंत्रित केले.

न्यूज अनकट प्रतिनिधी: ईश्वर वाघमारे